Қозоғистон интернет фойдаланувчилари Украинадаги уруш авж олаётган бир пайтда Россия армиясига қўшилиш таклиф қилинган рекламаларга тўқнаш келишни бошлади, деб ёзмоқда Reuters.
Россия армияси билан шартнома имзолаганларга 5 минг доллардан ортиқ бир марталик тўлов ваъда қилинган. Бундан ташқари, потенциал ёлланганларга ойига 2000 АҚШ доллари миқдорида маош, шунингдек, хабарда кўрсатилмаган қўшимча имтиёзлар таклиф этилади.
Агентликнинг қайд этишича, реклама қозоғистонликларга «аниқ йўналтирилган». Унда Россия ва Қозоғистон байроқлари тасвирланган бўлиб, ёнида «елкама-елка» шиори ёзилган.
Рекламадаги ҳавола Сахалиндаги Россия армиясига қўшилишни таклиф қиладиган сайтга олиб боради. Саҳифа Сахалин вилоятининг Инсон капиталини ривожлантириш агентлигига тегишли бўлиб, унинг сайтида таъкидланишича, «корхоналар учун малакали ходимларни жалб қилади ва ўқитади».
Сахалин ташкилотининг қўнғироқ марказида операторлар Қозоғистонда реклама жойлаштириш ҳақидаги маълумотга изоҳ бера олмадилар. Қозоғистон Ахборот ва ижтимоий ривожланиш вазирлиги ҳам Reuters сўровларига жавоб бермаган.
Reuters, шунингдек, журналистларга ўз ватандошларининг бир қисми Россия армиясига ёки «Вагнер» каби хусусий ҳарбий қисмларга қўшилаётганини, лекин ёллаш одатда Россия ҳудудида амалга оширилаётганини айтган бир қанча марказий осиёликлар билан гаплашган.
Қозоғистон қонунчилиги мамлакат фуқароларига хориждаги қуролли можароларда қатнашишни тақиқлайди — ёлланиш белгилари бўлмаса, Жиноят кодексига кўра, бу 5 йилдан 9 йилгача қамоқ жазоси тайинланишига олиб келиши мумкин. Ёлланма ҳарбийлар эса 7 йилдан 12 йилгача озодликдан маҳрум қилиш билан жазоланади.
Март ойида Bloomberg ўз манбаларга таяниб, Кремль 2023 йил охиригача 400 минг шартнома бўйича ҳарбий хизматчиларни қўшинларга жалб этиш вазифасини қўйганини ёзган эди. Бу Россия расмийларига сафарбарликнинг янги тўлқинидан қочиш имконини беради
