Фарғона вилоятида 8 ойлик қизини 10 минг долларга сотмоқчи бўлганида қўлга олинган аёлга нисбатан суд ҳукми ўқилиб, унга нисбатан 5 йил муддатга озодликни чеклаш жазоси тайинланди. Бу бўйича суд қарори Олий суд сайтида эълон қилинди.
Иш ҳужжатига кўра, судланувчи Н.М. фарзанди — 2022 йил 27 августда туғилган С.М.ни сотиш мақсадида 2023 йил апрель ойи бошларида Ф.А. (аёл) билан танишиб, унинг қиз фарзанд асраб олиш мақсадида юрганидан хабар топиб, унга фарзандини 10 минг долларга сотишга рози бўлган.
Ф.А.нинг билдиришича, у аёлнинг хатти-ҳаракатларидан шубҳа қилгани учун Фарғона вилояти ИИБ ва ДХХ бошлиқлари номига ариза билан мурожаат қилган ва аёлга нисбатан чора кўришни сўраган.
Ўтказилган тезкор тадбирда фуқаро Н.М. фарзандини Учкўприк туманида келишилган 10 минг долларга сотиб, кимёвий ишлов берилган пулларни олганда ушланган.
Жараёнда Фарғона шаҳридаги массажхонада яшаб, шу ерда ишлаган Н.М. оилавий шароити ёмон экани учун қизини сотиб, Учкўприк туманидаги кўп қаватли уйдан квартира сотиб олмоқчи бўлганини билдирган.
Судда Н.М.нинг ёлғиз оналиги, қорнида 12 ҳафталик ҳомиласи борлигини, оилада ягона боқувчи экани, қилмишидан чин кўнгилдан пушаймонлигини ҳисобга олиб, у айбланаётган модда санкциясида назарда тутилмаган озодликдан чеклаш жазоси тайинлашни лозим топди.
Суд Н.М.га нисбатан, Жиноят кодексининг 135-моддаси 3-қисмининг «а» банди (18 ёшга тўлмагани айбдорга аён бўлган шахсга нисбатан одам савдоси) билан айбдор деб топилган бўлса-да, 5 йил муддатга озодликни чеклаш жазосини тайинлади.
Бу модда бўйича айбдор 8 йилдан 12 йилгача озодликдан маҳрум қилиш билан жазоланади.
