28 июль куни Фарғонада Ички ишлар вазирлигининг кенгайтирилган йиғилишида иштирок этаётган президент Шавкат Мирзиёев қатор ҳуқуқ-тартибот идоралари раҳбарларини лавозимдан озод этди, дея хабар бермоқда давлат раҳбари матбуот хизмати.
Жиноятчиликни жиловлаш ва аҳоли билан ишлашда сусткашликка йўл қўйгани учун Бош прокурорнинг биринчи ўринбосари Баҳриддин Валиев, ички ишлар вазирининг биринчи ўринбосари Шавкат Раҳмоновга ҳайфсан берилди ва уч ой синов муддати тайинланди. Маҳаллада профилактика инспекторлари ишини лозим даражада ташкил қилмагани учун, ички ишлар вазирининг ушбу соҳага масъул ўринбосари Бекмурод Абдуллаевга ҳам худди шундай жазо берилди.
Ички ишлар вазирининг рақамлаштириш учун масъул ўринбосари зиммасига юклатилган бирорта вазифа охиригача етказилмагани кўрсатиб ўтилди ва шу муносабат билан вазир ўринбосари Нажмиддин Тўрахожаев эгаллаб турган лавозимидан озод қилинди.
Барча вилоят прокурорлари ва ИИБ бошлиқларининг биринчи ўринбосарлари ўзига тегишли хулоса қилмаса, йил якуни билан барчаси лавозимидан озод этилиши қайд этилди.
Шунингдек, жиноятчиликка қарши курашишда сусткашликка йўл қўйган Сергели, Янгиҳаёт, Шайхонтоҳур, Ғиждувон, Когон, Тупроққалъа, Тахтакўпир, Томди, Яккабоғ, Олтинсой, Зафаробод, Боёвут, Гулистон, Мингбулоқ, Олтинкўл туманлари ички ишлар бошлиқлари ишдан олинди.
Андижон, Бандихон, Бувайда, Нарпай, Юнусобод туманлари прокурорлари эгаллаб турган лавозимидан озод қилинди.
