Андижон вилояти ИИБнинг бир қанча мансабдор шахслари ва МИБнинг Андижон шаҳри бўлими ходими Жиноят кодексининг 2 моддаси бўйича судланмоқда. Бу ҳақда олий суд матбуот котиби Азиз Абидов маълум қилди.
Таъкидланишича, Жиноят ишлари бўйича Балиқчи тумани судида
- 40 ёшли М.М. (вилоят ИИБ Молия ва моддий техника таъминоти бошқармаси бошлиғининг биринчи ўринбосари — молия таъминот хизмати бошлиғи лавозимида ишлаган);
- 40 ёшли Д.А. (вилоят ИИБ Молия таъминот хизмати бошлиғи ўринбосари — бухгалтерия ҳисоби ва ҳисобот бўлими бошлиғи лавозимида ишлаган);
- 36 ёшли Ш. М. (вилоят ИИБ Молия ва моддий техника таъминоти бошқармаси молиявий таъминот хизмати бухгалтерия ҳисоби ва ҳисобот бўлими ҳисобчиси лавозимида ишлаган);
- 39 ёшли Ш. А. (МИБ Андижон шаҳри бўлимида давлат ижрочиси лавозимида ишлаган)га оид жиноят ишини кўриб чиқиш бўйича очиқ суд жараёни бўлиб ўтмоқда.
Судланувчилар Жиноят кодексининг 167-моддаси (Ўзлаштириш ёки растрата йўли билан талон-торож қилиш) 3-қисми «а», «г» бандлари ва 209-моддаси (Мансаб сохтакорлиги) 2-қисми «а» бандида назарда тутилган жиноятларни содир этганликда айбланмоқда.
Дастлабки айблов хулосасига кўра, жиноят оқибатида жами 5,6 млрд сўмдан зиёд миқдорида маблағ талон-торож қилинган.
