22 июль куни тармоқларда Rixdinas номи билан танилган модель ва дизайнер Мадина Махмудова Тошкент метрополитенида Cosmodinass брендидаги кийимларни намойиш қилди. Видео моделнинг Instagram`даги саҳифасига жойланганидан сўнг у Метрополитенда хавфсизликни таъминлаш бошқармасига чақирилиб, тушунтириш ишлари олиб борилди.
«Метрода „показ“ қилдим. Жуда шов-шув бўлиб кетди. Кутилганди, лекин бу даражада эмас. Чунки мени чақиришди ҳам. Албатта, 15 сутка ўтирмайман. Борганда тушунтириш ҳати ёзиш кераклигини айтишди. Метрода бизга ҳеч ким ёмон муносабатда бўлмади, олдимизга келиб, комплиментлар қилишди, тармоқлардаги профилимиз ва кийим бренди ҳақида сўрашди», — дея таъкидлаган блогер.
Транспорт ва туризм объектларида хавфсизликни таъминлаш департаменти моделлар билан тушунтириш ишлари олиб борилганини «Газета.uz»га тасдиқлаб, видеода жамоат тартиби ёки метрополитендан фойдаланиш қоидалари бузилмаганини қўшимча қилиб ўтди.
Департаментнинг қайд этишича, метрополитен бекатлари ва вагонларида оралиқ масофа чеклангани, темир йўл изларида юқори кучланиш мавжудлиги ҳамда метрополитендан фойдаланиш вақтида бошқа фуқароларга ноқулайликлар туғилмаслиги ёки улар томондан эътирозлар келиб тушишининг олдини олиш учун ҳар қандай тадбирлар «Тошкент метрополитени» раҳбариятининг ёзма рухсати ва МХТБ ходимларининг назорати остида амалга оширилиши мақсадга мувофиқ.
«Шу сабабдан юқоридаги видеони олган фуқаролар МХТБга чақиртирилган, бундай тадбирларни ташкиллаштиришдан олдин „Тошкент метрополитени“ ДУК билан келишилган ҳолда ўтказилиш юзасидан тушунтириш ишлари олиб борилган», — дейилади департамент баёнотида.
