Ўзгидромет хизмати агентлиги иш ҳафтаси — 24−28 июль саналарида кузатиладиган об-ҳаво ҳақида маълумот берди.
Бошланган ҳафтанинг катта қисмида Ўзбекистон ҳудуди бўйича иссиқ об-ҳаво бўлиши кутилмоқда. Кундуз кунлари ҳарорат +39…+42 даражага, жанубда ва чўл ҳудудларда, шунингдек, 24−25 июль кунлари республика шимолида баъзи жойларда +43…+44 даражага етади.
27 июлда Қорақалпоғистон Республикаси ва Хоразм вилоятига, 28 июлда республиканинг барча ҳудудларига Қозоғистон ҳудудларидан нисбатан салқин ҳаво кириб келади ва ҳарорат 35…+38 даражагача, жанубда +40…+42 даражагача бироз пасаяди.
Бундай ҳарорат ҳафта охирида ҳам сақланиб туради.
Шимолда, жанубда ва чўл ҳудудларда шамол тезлиги 13−18 м/с гача, айрим жойларда 20−22 м/м гача кучайиши, чанг-тўзон кузатилиши мумкин. Тоғли ҳудудларда 24 июлда куннинг иккинчи ярмида ва ҳафта охирида баъзи жойларда қисқа муддатли ёмғир ёғиши, момақалдироқ бўлиши мумкин.
Пойтахтда 24−27 июль кунлари ҳаво асосан кам булутли бўлади, ёғингарчилик кутилмайди. Шамол шарқдан бироздан ўртача тезликгача эсади. Ҳарорат 24−27 июлда +39…+42 даража, 28 июлда +38…+40 даража бўлади.
Ушбу ҳафтада кунлар иссиқ бўлишига қарамай, ҳаво ҳарорати ўтган йилларда ўрнатилган рекорд кўрсаткичларга етиб бормайди. Шундай қилиб, республика ҳудудининг катта қисмида энг иссиқ июль ойларида максимал ҳаво ҳарорати +43…+46 даражани, шимолда, жанубда ва чўл ҳудудларда +47…+49 даражани ташкил этган.
Аввалроқ Соғлиқни сақлаш вазирлиги Жаҳон соғлиқни сақлаш ташкилотининг Европа минтақавий бюроси маълумотларига таяниб, жазирамадан сақланиш бўйича тавсиялар эълон қилганди.
