Анди Аранитаси Европа тикланиш ва тараққиёт банкининг (ЕТТБ) Ўзбекистондаги ваколатхонаси директори ҳамда раҳбари этиб тайинланди. У Тошкентда фаолият юритади ва 2023 йил 1 сентябрдан ўз ишини бошлайди, деб хабар бермоқда банк матбуот хизмати.
Албания ва Британия фуқароси бўлган Анди Аранитаси ишлаб чиқариш, телекоммуникация, агробизнес, мулк ва туризм ҳамда энергетика соҳаларида 25 йилдан ортиқ тажрибага эга. ЕТТБдаги фаолияти давомида у банкнинг энергетика бўлимида турли юқори лавозимларда ишлаган ва Туркия ҳамда Жануби-шарқий Европадаги энергия лойиҳаларини яратиш, амалга ошириш ва портфелини бошқариш учун масъул бўлган. Мазкур лавозимга тайинланишидан олдин Аранитаси ЕТТБнинг Шимолий Македониядаги ваколатхонасига раҳбарлик қилган.
«ЕТТБнинг энг динамик банк ва маслаҳат бўлинмаларидан бирига масъул этиб тайинланганимдан жуда мамнунман. Ўзбекистон тез ривожланаётган иқтисодиёт бўлиб, қайта тикланадиган энергия манбалари ва инфратузилмадан тортиб, кичик ва ўрта бизнесни ривожлантириш, тўғридан-тўғри хорижий инвестицияларни жалб қилишгача бўлган кўплаб соҳаларда катта тажриба ва молиявий қўллаб-қувватлашни талаб қилади. Мен ўз тажрибам ва кучимни мамлакат билан ҳамкорликни ривожлантиришга ва 2023 йил охиригача тасдиқланиши керак бўлган
Ўзбекистон бўйича янги давлат стратегиямизни амалга оширишга йўналтираман», — деди у.
Анди Аранитаси Болгариядаги Америка университетида бизнес бошқаруви ва амалий иқтисод бўйича бакалавр даражасини олган.
Янги раҳбар Алкис Дракиноснинг ўрнини эгаллайди. Дракинос 2017 йилда мамлакат билан қайта алоқа ўрнатилганидан бери банкнинг Ўзбекистондаги фаолиятини бошқариб келган ва ҳозирда у Тбилисида жойлашган Кавказ минтақавий ваколатхонасига раҳбар этиб тайинланган.
Бугунги кунга қадар ЕТТБ Ўзбекистон иқтисодиётига 144 та лойиҳа доирасида 4,37 миллиард евродан ортиқ сармоя киритди. Мамлакат кетма-кет уч йил давомида Марказий Осиёда банк маблағларини энг кўп олувчи давлат ҳисобланади.
