Қирғизистон ҳуқуқ-тартибот идоралари президентнинг жиянини коррупцияда гумон қилиб қўлга олди, деб хабар бермоқда 24.kg.
Қирғизистон раҳбарининг матбуот хизмати ҳибсга олинган Улан Жапаров Садир Жапаровнинг қариндоши эканини тасдиқлади.
«Қўлга олинган Улан Жапаровга келсак, у, ҳақиқатан ҳам, давлат раҳбарининг қариндоши эканини маълум қиламиз. У божхона масалалари билан боғлиқ коррупцион схемаларда иштирок этганликда гумон қилинмоқда», — деб ёзган президентнинг матбуот котиби Эрбол Султанбаев.
Султанбаев Қирғизистон президенти гумонланувчиларга нисбатан «барча қонуний чоралар кўрилишини шахсан ўзи талаб қилганини» қўшимча қилиб, «коррупцияга қарши курашишда танланиш йўқлигини» таъкидлаган.
«Ҳар қандай фуқаро, оилавий ва бошқа алоқаларидан қатъи назар, жиноят ёки ҳуқуқбузарлик содир этган тақдирда, қонун доирасида жавобгарликка тортилади», — деди Қирғизистон раҳбари матбуот котиби.
Бишкекнинг Первомайск тумани суди Улан Жапаров 26 июлга қадар ҳибсда сақланишини тасдиқлади.
24.kg манбасининг маълумотига кўра, қўлга олинган шахснинг отаси Ракимжан Жапаров Садир Жапаровнинг амакиваччаси ҳисобланади.
