Венгрия Картошкачилик илмий маркази директори Полгар Сзолт халқаро шериклик ташаббуслари ҳафталиги доирасида ташкил этилган «Янги Ўзбекистонда 2030 йилгача қишлоқ хўжалигининг ривожланиш стратегияси: имкониятлар ва истиқболлар» сессияси Ўзбекистон картошка уруғини импорт қилишни тўхтатиши кераклигини маълум қилди. Бу ҳақда ЎзА хабар берди.
Унинг таъкидлашича, ўтган йили Ўзбекистон 50 минг уруғлик картошка импорт қилган ва бундай савдони ҳар йили такрорлашга эҳтиёж пайдо бўлмоқда.
«Шунинг учун биз қисман бўлсада маҳаллий ишлаб чиқариш билан ушбу импортни камайтиришга эришишни кўзда тутганмиз, айнан ушбу мақсад лойиҳамизни ўзига хослигини таъминлайди», — деди Ўзбекистон — Венгрия картошкачилик илмий-тадқиқот институти вакили.
Полгар Сзолт Венгрия ва Ўзбекистон мутахассислари импорт ўрнини босиш мақсадида маҳаллий картошка уруғчилигини йўлга қўймоқчилигини қайд этиб ўтди.
«Ўйлайманки, агар тўғри нав ва сифатли уруғ бўлса, у ҳолда атроф-муҳитни асраган ҳолда, пестицид ва кимёвий моддаларни камроқ ишлатиб, картошка етиштиришимиз мумкин. Картошка жуда интенсив ўсимлик ҳисобланади. Демак, яхши ҳосилдорликка эришиш учун бошиданоқ сифатли уруғлик ва яхши навга эга бўлсагина талаб ошади», — деди мутахассис.
Эслатиб ўтамиз, апрель ойида Ўзбекистонда аҳоли ва деҳқончилик хўжаликлари импорт қилинган ёки маҳаллий сифатсиз картошка экаётгани маълум қилинган эди. Шу сабабли президент мутасаддиларга аҳоли томорқалари учун 500 тонна элита картошка уруғларини бепул тарқатишни, картошка етиштирувчиларга имтиёзли маблағлар ажратиш вазифасини қўйганди.
2021 йилда Ўзбекистон Ўзбекистон-Венгрия Картошкачилик илмий маркази ёрдамида 50 дан ортиқ навларни маҳаллийлаштириш ва картошкачилик генофондини яхшилаш орқали 2024 йилга келиб, уруғлик картошка бўйича импорт ўрнини тўлиқ қоплашни мақсад қилганди.
