Статистика агентлиги маълумотларига кўра, Ўзбекистонда фаолият кўрсатмаётган корхона ва ташкилотларнинг умумий корхоналар сонидаги улуши 1 июнь ҳолатига 27 фоизни ташкил этди. Рўйхатдан ўтган кичик тадбиркорлик субъектларининг эса 30 фоизи ишламаяпти.
2022 йил маълумотларига кўра, рўйхатдан ўтган корхона ва ташкилотларнинг 6 фоизи, кичик бизнесда рўйхатдан ўтган корхоналарнинг эса 7 фоизи ишламаётганди.
Агентлик берган изоҳга кўра, фаолият кўрсатмаётган корхоналар сонининг ортиши йил бошида кўп кичик корхоналар очилиши, кейинчалик эса фаолияти яхши натижа бермаса, тугатилиши мумкинлиги билан боғлиқ.
Маълумот ўрнида, иқтисодиёт ва молия вазири Шерзод Кудбиев Қонунчилик палатаси олдидаги ҳисоботида 2022 йилда 90,2 мингта янги тадбиркорлик субъекти ташкил этилиб, легал фаолият олиб бораётган тадбиркорлар сони кескин кўпайганини қайд этганди.
Фаолият кўрсатмаётган корхоналар улуши ортаётгани қарамай, йилнинг дастлабки 5 ойида саноат ишлаб чиқаришининг физик ҳажми 5,7 фоизга, чакана савдо товар айланмаси 7,2 фоизга, қурилиш ишлари ҳажми 4,7 фоизга, бозор хизматлари ҳажми эса 12,6 фоизга ўсган.
Шунингдек, истеъмол нархлари индекси ўтган йилнинг декабрь ойига нисбатан 3,8 фоизга ошган. Мамлакат ташқи савдо айланмаси ўсиши эса 25,4 фоизни ташкил этган. Бунда экспорт 24,1 фоиз, импорт 26,4 фоизга ошган.
