Фарғонада табиат ресурслари инспекцияси бош мутахассиси пора олаётган вақтида ушланди. Бу ҳақда Бош прокуратура ҳузуридаги Иқтисодий жиноятларга қарши курашиш департаменти маълум қилди.
Таъкидланишича, департаментнинг Данғара тумани бўлими томонидан ИИБ ходимлари билан ҳамкорликда тезкор тадбир ўтказилган. Унда инспекция бош мутахассиси М.А. фуқаро А.Т.нинг ов қилиш тақиқланган ҳудудда пневматик қурол билан ноқонуний балиқ овлагани бўйича маъмурий баённома расмийлаштирмагани аниқланган. М.А. олиб қўйилган пневматик қуролни эгаси У.Р.га қайтариб бериш эвазига ўз хизмат хонасида 1 млн сўмни олган вақтида ашёвий далиллар билан ушланган.
Ҳолат юзасидан Жиноят кодексининг 210-моддаси (Пора олиш) билан жиноят иши қўзғатилиб, тергов ҳаракатлари ўтказилмоқда.
Аввалроқ «Сирдарё сув таъминоти» компаниясининг Гулистон шаҳридаги назоратчи-инспектори фуқаронинг ичимлик сувидан 3,7 млн сўмлик қарздорлигини ёпиб бериш эвазига 1,7 млн сўм олган вақтда ушлангани ҳақида хабар берилганди.
