«Тошкент» республика фонд биржасининг 9 июндаги қарори билан «Халқ банки» акциядорлик тижорат банкининг оддий акциялари 12 июндан биржага чиқарилди.
«„Тошкент“ РФБнинг 2023 йил 9 июндаги бошқарув қарори билан „Халқ банки“ АТБнинг оддий акциялари (UZ7055620007) XKBK — биржа тикери билан 12 июндан биржа котировкалаш варағи Stock Market акциялар бозорининг „Стандарт“ категориясига киритилди», — дейилади республика фонд биржаси хабарида.
2021 йил 13 апрелда президент фармони билан 2021−2023 йилларда акциялари фонд биржасида оммавий савдо учун жойлаштириладиган компаниялар рўйхати тасдиқланганди. Мазкур рўйхатга «Халқ банки» ҳам киритилган.
2022 йил 18 март куни имзоланган президент қарори билан «Халқ банки», «Микрокредитбанк», «Алоқабанк», «Агро банк», «Ўзмиллийбанк»ларнинг акцияларини фонд биржаси орқали оммавий жойлаштириш (IPO) 2023 йил 1 июлга қадар амалга оширилиши белгиланганди.
2023 йил 24 март куни президент яна бир қарорни имзолади. Ҳужжат билан акциялари пакетлари «Бир акция — битта лот» тамойили бўйича халқ IPO`сини ўтказиш тартибида очиқ кимошди савдолари орқали сотиладиган 40 та корхона рўйхати тасдиқланган. «Халқ банки» бу рўйхатда ҳам қайд этиб ўтилган бўлиб, қарорга кўра, акциялари сотилган корхоналар беш йил давомида соф фойдасининг камида 30 фоизи дивиденд тўлашга йўналтиради.
2023 йилнинг биринчи чораги маълумотларига кўра, банкнинг устав капитали 7,35 триллион сўмни ташкил этади ва 5,29 триллион сўмлик ўз капиталига эга. Биринчи чоракдаги соф даромади 61,37 миллиад сўмни ташкил этган.
