Англиянинг «Манчестер Сити» футбол клуби УЕФА Чемпионлар лигаси финалида Италиянинг «Интер» жамоасини мағлуб этди. 11 июнга ўтар кечаси Истанбулдаги Отатурк олимпия стадионида бўлиб ўтган учрашув 1:0 ҳисобида якунланди.
«Манчестер» ярим ҳимоячиси Родри 68-дақиқада учрашувдаги ягона ғалаба голини киритди.
«Манчестер Сити» учун бу Чемпионлар лигаси финали тарихдаги иккинчи финал бўлди. 2021 йилда Гвардиола бошчилигидаги жамоа «Челси»га 0:1 ҳисобида имкониятни бой берганди.
Бош мураббий Хосеп Гвардиола жамоаси «требл»ни расмийлаштириб, мавсумнинг учта йирик совринини қўлга киритган 10-жамоага айланди. Аввалроқ «Манчестер Сити» 89 очко билан АПЛда биринчи ўринни эгаллаган ва финалда «Манчестер Юнайтед» устидан 2:1 ҳисобида ғалаба қозониб, Англия кубогини қўлга киритганди.
«Манчестер Сити» Еврокубокда 1970 йилдан бери илк бор ғалабани қўлга киритди. Ўшанда Кубок эгалари кубоги финалида Польшанинг «Горник» жамоасини 2:1 ҳисобида мағлуб этган эди.
