Ўзбекистон олтин-валюта захиралари кетма-кет иккинчи ой камайди. Марказий банк маълумотларига кўра, 1 июнь ҳолатига захиралар ҳажми 34,3 млрд долларни ташкил этган. Бу 1 май кунги кўрсаткичдан (35,2 млрд доллар) 837 миллион долларга кам.
Хорижий валютадаги захиралар ой давомида 10,09 млрд долларгача кўпайган (+$ 158,2 млн). Шунга қарамай, хорижий валютадаги захиралар қиймати йил бошидаги 11,66 млрд долларлик кўрсаткичдан камлигича қолмоқда (-$ 1,55 млрд).
Захирадаги олтин қиймати 980,6 млн долларга камайиб, 23,2 млрд долларни ташкил этган. Захирадаги олтиннинг жисмоний ҳажми 0,3 млн трой унцияга (12,2 млн трой унциядан 11,9 млн трой унциягача), яъни 9,3 тоннага камайган. Йил бошидан бери захирадаги олтин ҳажми 12,7 млн трой унциядан 11,9 млн трой унциягача пасайган.
Апрель ойида олтин захираларининг қиймати 50 млн долларга тушиб, 24,2 млрд долларни ташкил қилганди ва қимматбаҳо металлнинг жисмоний ҳажми ой давомида 0,1 миллион трой унцияга (3,1 тонна) камайганди. Олтин захираларининг камайиши олтин нархининг кўтарилиши фонида содир бўлганди.
Мавжуд захиралар мамлакатнинг 2022 йилги импорти қиймати — 30,67 миллиард доллардан кўпроқни ташкил этади. Ривожланаётган мамлакатлар учун халқаро ташкилотларнинг тавсияларига кўра, захиралар камида уч ойлик импорт ҳажмини қоплаши керак.
