Самарқандда тўрт нафар йигит кўп қаватли уйнинг деразасидан тушиб кетган қизчанинг ҳаётини сақлаб қолди, дея хабар бермоқда вилоят Ички ишлар бошқармаси матбуот хизмати.
1 июнь куни Самарқанд шаҳридаги мактаблардан бирининг 11-синфини битираётган Ш.Бобораҳимов, М.Саидалимов, О.Ўткиров ва Ж.Эшназаров сайр қилиб юришганда кўп қаватли уйнинг 4-қаватида боши панжара орасига тиқилиб, танаси ҳавода осилиб турган кичик ёшдаги қизни кўриб қолган.
Ўқувчилардан бири қизалоқнинг ота-онасига хабар бериш учун квартирага чиққан, қолганлари у осилиб қолган балкон остида қўлларини чўзиб, тирик қутқарув панжарасини ҳосил қилган. Шу пайтда қизалоқ пастга қулаб тушганда йигитлар уни тутиб олган.
Аниқланишича, қизнинг онаси уй ишлари билан овора бўлган пайтда у балконга чиқиб қолган. Қиз пешонасидан енгил жароҳат олган ва касалхонага ётқизилган. Ҳозирда у ўзини яхши ҳис қилмоқда, дейилади Ogoh.uz хабарида.
