Венгрия пойтахти Будапешт шаҳридаги Пушкаш-Арена стадионида 1 июнга ўтар кечаси Европа Лигаси финали бўлиб ўтди. Унда Испаниянинг «Севилья» жамоаси Италиянинг «Рома» клубига қарши майдонга тушиб, пенальтилар сериясидаги устунлик эвазига 7-марта ушбу кубокни ўзиники қилиб олди.
61 мингдан зиёд мухлис ташриф буюрган ўйиннинг биринчи бўлимида Пауло Дибала «Бўрилар»нинг асосий вақтдаги ягона голига муаллифлик қилган бўлса, иккинчи таймда Жанлука Манчини ўз дарвозасига тўп киритиб, мувозанатни тиклади.
Қўшиб берилган вақтда ҳам ҳисобда ўзгариш бўлмагач, жамоалар ўзларини пенальтилар сериясида синаб кўрди. Унда «Севилья» 4:1 ҳисобида устун келди.
Ушбу ғалаба орқали ғолиб жамоа Чемпионлар Лигаси йўлланмасини қўлга киритди. Эътиборли жиҳати, «Севилья» бу турнирнинг финал баҳсида ҳали ютқазмаган. Римликлар мураббийи Жозе Моуриньо эса еврокубоклар финалидаги (Суперкубокни ҳисобга олмаганда) биринчи марта мағлубиятга учради.
Фото
