30 май куни соат 16:00 атрофида Сурхондарё вилояти Сариосиё туманида фуқаро профилактика инспекторига болта билан ҳужум қилди, дея хабар бермоқда Ички ишлар вазирлиги матбуот хизмати.
Туманнинг «Ҳамкорлик» маҳалласи раиси Нурмамат Шоймардоновнинг уйига маҳаллада яшовчи 1976 йилда туғилган, муқаддам бир неча маротаба ўғирлик ва гиёҳванд моддалар билан ноқонуний муомала қилиш жиноятларини содир этгани учун судланган, гиёҳванд шахс сифатида профилактик назоратга олинган А.И. маст ҳолда бостириб кирган.
Маший муаммоларини рўкач қилган ҳолда маҳалла раиси ва уйда бўлган оила аъзоларининг тинчлигини бузиб, жанжал кўтарган, сўнгра қочиб кетган. Олиб борилган қидирув тадбирлари натижасида шу куни соат тахминан 19:00 атрофида А.И. ўз уйига қайтиб келгани аниқланган.
У билан профилактик суҳбат ўтказиш ҳамда маҳалла раисига нисбатан содир этган ҳуқуқбузарлик ҳолатини расмийлаштириш мақсадида фуқаронинг хонадонига борган маҳалла профилактика инспектори капитан Ғофур Бердиев хонадон эгасининг қаршилигига учраган.
«Хонадон эгаси болта билан профилактика инспекторига ҳужум қилган. Унинг чап қўл тирсагини яралаганига қарамасдан, жисмоний куч ишлатилиб, ҳуқуқбузар зарарсизлантирилган», — дейилади хабарда.
Шундан сўнг, инспектор хонадон қўшнилари ва воқеа жойига етиб келган ҳамкасблари ёрдамида шифохонага етказилган. Тиббий кўрик натижасида чап тирсак пастки қисми суякларининг очиқ синганлиги ва қон томирларини кесилиши оқибатида кўп қон йўқотганлиги аниқланиб, тегишли муолажалар кўрсатилган.
Ҳозирда ҳолат юзасидан Сариосиё тумани прокуратураси томонидан тегишли моддалар билан жиноят иши қўзғатилиб, гумонланувчи шахс процессуал тартибда қамоққа олинган.
