Косово шимолида серб намойишчилари полиция ва НАТОнинг минтақада барқарорликни таъминлаш учун масъул бўлган KFOR тинчликпарвар кучлари билан тўқнашуви оқибатида ўнлаб одамлар жароҳат олди, деб хабар бермоқда BBC.

KFOR (Kosovo Force) маълумотларига кўра, миссиянинг 25 нафар вакили жароҳатланган. Венгрия ва Италиядан келган тинчликпарвар кучлар синиш ва куйиш каби жароҳатлар олди, дейилади миссия. Сербия президенти Александр Вучичга кўра, 50 дан ортиқ серб яраланган.

Минтақадаги вазият апрель ойида, Косовонинг шимолий қисмидаги серблар кўп бўлган бир қанча шаҳарларида маҳаллий сайловлар ўтказилганда кескинлашган. Серблар бу сайловларни бойкот қилган ва натижада албан сиёсатчилари ғалаба қозонган. Сайловчилар 4 фоиздан камроқни ташкил этган.

"Газета.uz"да реклама

26 май куни албан мэрлар ўз лавозимига киришган. Косовонинг аксарият серб муниципалитетларида маъмурий бинолар олдига йиғилган маҳаллий аҳоли бунга қарши норозилик билдирган. Шундан сўнг намойишчилар ва полиция ўртасида тўқнашувлар келиб чиққан.

29 май куни полицияга ёрдам бериш учун KFOR отрядлари юборилган. Энг йирик тўқнашувлар Звечан муниципалитетида қайд этилган.

Звечан кўчаларида юз берган тўқнашувлар тасвири.

НАТО ва бир қатор Ғарб давлатлари вазиятга аллақачон муносабат билдирди. НАТО KFOR`га қилинган ҳужумларни «мутлақо номақбул» деб атади ва барча томонларни «қарама-қаршиликни кучайтирувчи ҳаракатлардан тийилишга» чақирди.

АҚШ давлат котиби Энтони Блинкен ўз баёнотида Косово ҳукуматининг «шимолда таранглик ва беқарорликнинг кучайишига олиб келадиган» ҳаракатларини қоралади. У «зўравонлик чораларини тўхтатиш» ва мулоқотга чақирди.

Германия Ташқи ишлар вазирлиги ҳам «зўравонлик ва кескинликни кучайтирадиган ҳар қандай ҳаракатни зудлик билан тўхтатиш» ва Белград ва Приштина (пойтахтлар) ўртасида музокаралар олиб боришга чақирди.

Косово 2008 йил февралида серблар ва асосан албанлар ўртасидаги кўп йиллик тўқнашувлардан сўнг Сербиядан мустақиллигини бир томонлама эълон қилган. Шу кунгача Косово мустақиллигини 117 та давлат, жумладан, АҚШ ва Европа Иттифоқининг аксарият давлатлари тан олган.