Футбол бўйича 20 ёшгача бўлган Ўзбекистон ёшлар терма жамоаси Аргентинада ўтаётган U-20 жаҳон чемпионатининг гуруҳ босқичидаги учинчи учрашувда Гватемала устидан 2:0 ҳисобида ғалаба қозонди. Шу тариқа Равшан Ҳайдаров шогирдлари 4 очко билан 2-ўринни эгаллаб, 1/8 финалга йўл олди.
Голларнинг иккиси ҳам биринчи бўлимда Шаҳзодбек Неъматжонов (9 ва 21-дақиқаларда) томонидан киритилди. 71-дақиқада дубль муаллифининг ўрнига майдонга тушган Нодирбек Абдураззаков 82-дақиқада ҳисобни 3:0 кўринишига келтирди, аммо гол VAR тизимида кўриб чиқилгач бекор қилинди.
Статистикага кўра, Ўзбекистон 51% тўпга эгалик қилди, Гватемала дарвозасига 5 та зарба берилди, уларнинг 4 таси аниқ бўлди.
Шу тариқа, Янги Зеландиядан 5:0 ҳисобида устун келган Аргентига 9 очко билан «А» гуруҳида 1-ўринни эгаллади. Гватемала (0 очко билан) гуруҳда 4-бўлди, Янги Зеландия 4 очко билан 3-ўринни қайд этди. Ўзбекистон эса 4 очко билан 2-ўринни банд этди.
1/8 финални жамоа сардори Умарали Раҳмоналиев сариқ карточкалар сони сабаб ўтказиб юборади.
Ўзбекистон U-20 жамоаси 30 май куни нимчорак финалда «С» гуруҳида 2-ўринни эгаллаган жамоа билан майдонга тушади. Уларнинг рақиби Япония ёки Исроил бўлиши кутилмоқда.
Фото
