Флорида штати губернатори Рон Десантис 2024 йилги АҚШ президентлик сайловларида ўз номзодини қўйишини маълум қилди, деб хабар бермоқда BBC. Сиёсатчи АҚШ Федерал сайлов комиссиясига ариза юборган.
«Мен Американинг буюк қайтишига раҳбарлик қилиш учун президентликка номзодимни қўйяпман», — деб ёзди у Twitter`да.
44 ёшли Десантис Республикачилар партиясидан вакиллик қилади ва собиқ президент Дональд Трамп билан Республикачилар партиясидан номзодлик учун курашади. Америка матбуоти Десантисни Трампнинг асосий рақиби сифатида кўрмоқда.
Рон Десантис ҳақида нималар маълум?
Сиёсатга киришдан олдин Рон Десантис денгиз флотида юрист бўлган. 2012 йилда у АҚШ Конгресси аъзолигига сайланган, 2018 йилда эса Флорида губернатори бўлган. 2022 йилда Десантис катта фарқ билан лавозимга қайта сайланган ҳамда Республикачилар партиясида ўсиб бораётган юлдуз сифатида кўрила бошлаган.
Флорида губернатори бўлган даврда сиёсатчи штатда абортларни чеклаб қўйди, аҳолига яширин қурол олиб юришни осонлаштирди ва давлат университетларида инклюзив дастурларни молиялаштиришни тақиқлади.
АҚШдаги сайловлар
АҚШда президентлик сайловлари 2024 йил 5 ноябрда бўлиб ўтади. Унда АҚШнинг амалдаги президенти Жо Байден ва собиқ президент Дональд Трамп иштирок этади.
Сайловда АҚШнинг 35-президенти Жон Кеннедининг жияни, адвокат Роберт Кеннеди ва Жанубий Каролина собиқ губернатори Никки Хейли ҳам ўз номзодини илгари сурган.
