Футбол бўйича 20 ёшгача бўлган Ўзбекистон ёшлар терма жамоаси Аргентинада бўлиб ўтаётган 20 ёшгача бўлган футболчилар ўртасидаги жаҳон чемпионатининг илк ўйинида мағлубиятга учради. 21 майга ўтар кечаси Сантьяго-дель-Эстерода турнир мезбони Аргентинага қарши кечган учрашув 2:1 ҳисобида якунланди.
Учрашувда биринчи бўлиб ўзбекистонликлар ҳисобни очишди. Ярим ҳимоячи Маҳмуджон Махамаджонов 23-дақиқада жарима майдончаси ичида тўпни эгаллаб олди ва яқин бурчакка йўллади. Аргентиналик футболчилар ўйинни тўхтатиб, офсайд бўлганига ишора қилишди, бироқ ҳакам қайта текширганидан сўнг голни ҳисоблади.
Орадан 4 дақиқа ўтиб аргентиналиклар ҳисобни тенглаштирди. Ҳужумчи Алехо Велис тўпни боши билан дарвозага йўллади, дарвозабон Отабек Боймуродов уни тутиб қола олмади.
Орадан бироз вақт ўтиб Агустин Жай жарима майдончаси ичида Махамаджоновни йиқитди. Бош ҳакам Франсуа Летексиер пенальти белгилади, бироқ ён ҳакам билан маслаҳатлашганидан кейин қарорини бекор қилди.
41-дақиқада ҳужумкор ярим ҳимоячи Валетин Карбони яқин бурчакка кучли зарба йўллаб жамоасини олдинга олиб чиқди.
Шу тариқа, бош мураббий Равшан Ҳайдаров шогирдлари турнирни мағлубият билан бошлашди. «А» гуруҳининг яна бир учрашувида Янги Зеландия Гватемалани мағлуб этди (1:0).
Кейинги ўйинда Ўзбекистон 23 май куни Янги Зеландия билан ўйнайди.
Статистика
Видео
Фото
