Сурхондарё вилояти Музработ туманида ички ишлар ходими фуқарога куч ишлатаётгани акс этган видео тарқалди. Вилоят ИИБ ахборот хизмати ҳолат юзасидан муносабат билдирди.

Видеода эркаклар учун ажратилган махсус хонада бир фуқаро қўл ва оёқлари боғланган ҳолда ётгани, сўнгра у ерга ИИБ ходими кириб, бироз гаплашгач, эркакнинг боши ва юзига қўли билан зарба берганини кўриш мумкин. Ходим хонани бир неча бор тарк этиб, яна қайтиб кирган ва эркакни видеотасвирга олган. Бу орада эркакка нисбатан яна куч ишлатилган, шунингдек, унинг оғзи боғлаб қўйилган.

Вилоят ИИБ муносабати

Ички ишлар бошқармасининг ҳолатга аниқлик киритишича, воқеа 7 май куни содир бўлган. Соат 01:10 да туманнинг «Шаффоф» маҳалласида яшовчи С.С. исмли аёл туман ИИБ навбатчилик қисмига қўнғироқ қилган ва уйига нотаниш шахс келиб (вилоят прокуратураси эркак шу туманнинг «Янгиҳаёт» маҳалласидан эканини билдирди) кўп марта эшигини тепиб, жанжал қилаётганини айтган.

Таъкидланишича, шу куни тунги хизматга жалб қилинган туман ИИБ ходими М.А. чақирилган манзилга борганда фуқаро У.П. (эркак) кучли алкоголь мастлик ҳолатида ходимнинг қонуний талабини бажармаган (воқеа жойидан қочиб кетган — прокуратура).

Ходим уни (топиб) туман тиббиёт марказида ташкил этилган Алкоголь мастлик ҳолатидаги шахсларга тиббий ёрдам кўрсатиш туманлараро пунктига олиб борган.

«Тиббиёт бирлашмасида ҳам даволанаётган беморларнинг тинчлигини бузиб, қонуний талабларга бўйсунмасдан, қўпол сўзлар билан ҳақоратлашда давом этган У.П.ни тинчлантириш мақсадида ИИБ ходими қатъий ҳаракат қилган», — дея ҳолатни изоҳлади ИИБ.

Ҳозирда ходимнинг ҳаракатлари юзасидан вилоят ИИБ ва туман прокуратураси томонидан хизмат текшируви ўтказилмоқда.