Тошкент шаҳри Учтепа туманида савдо ва маиший хизмат кўрсатиш мажмуаси эскиз лойиҳасига риоя қилинмаган ҳолда қурилаётгани аниқланди. Қурилиш ва уй-жой коммунал хўжалиги вазирлигининг «Газета.uz»га маълум қилишича, ҳудудий назорат инспекцияси вазиятни ўрганиб чиққан ва ҳозирда бинонинг қурилиш ишлари тўхтатилган.
Бинони қуриш учун Max group house МЧЖ буюртма берган. Қурилиш-монтаж ишларини бошлаш тўғрисида 2021 йилда назорат инспекциясига хабарнома юборилган. Бино эскиз лойиҳаси Тошкент шаҳри қурилиш бош бошқармасининг тегишли хулосаси билан 3 қаватга келишилган. 2021 йилда эса ушбу объектда лойиҳадан четга чиққан ҳолда қўшимча қаватлар қурилиши аниқланган.
Мазкур қоидабузарлик юзасидан тадбиркорга бир неча марта ёзма кўрсатма ҳамда огоҳлантириш хатлари берилишига қарамасдан, қурилиш ишлари давом этган.
Вазирлик хабарига кўра, тадбиркор Маъмурий жавобгарлик тўғрисидаги кодекснинг 99-моддаси (Шаҳарсозлик тўғрисидаги қонунчиликни бузиш) тегишли бандлари асосида жавобгарликка тортилган. Ушбу объект юзасидан суд органларига 3 қаватдан ташқари қўшимча қаватларни бузиш бўйича даъво аризалари киритилган.
«Судга қўшимча қурилган бинони бузиш бўйича даъво аризаси киритилди. Бино 12+1 қаватдан иборат экан. Буни ўша куни ўрганиш олиб борган вақтимизда аниқладик», — дея маълумот берди вазирлик ходими.
