Наманган вилояти ИИБ ижтимоий тармоқларда «Наманган давлат университети олдида йигит яхши кўрган қизини пичоқлаб ўлдиргани айтилмоқда» изоҳи билан тарқалган видео юзасидан муносабат билдирди.
Маълум бўлишича, 6 май куни соат 12:00 да Тўрақўрғон туманида яшовчи фуқаро Наманган давлат педагогика институти биноси олдида оилавий келишмовчилик сабабли ўзининг собиқ турмуш ўртоғи билан жанжаллашиб, унга пичоқ урган. Оқибатда аёл тан жароҳати олиб, вафот этган.
Ҳолат юзасидан Наманган шаҳри прокуратураси томонидан Жиноят кодексининг 97-моддаси (Қасддан одам ўлдириш) билан жиноят иши қўзғатилиб, гумон қилинувчи процессуал тартибда ушланган ва ҳозирда тергов ҳаракатлари олиб борилмоқда.
Бош прокуратура матбуот хизматининг билдиришича, эркак 26 ёшда, унинг аёли 23 ёшда бўлган.
Эркак собиқ хотинини пичоқлагандан сўнг ўзига бир неча маротаба пичоқ билан жароҳат етказиб, жонига суиқасд қилган. Шу вақтда воқеа жойида бўлган фуқаролар томонидан эркак шифохонага ҳушсиз ҳолатда олиб борилган.
Аниқланишича, ушбу жиноятни содир қилган шахс турмуш ўртоғи билан 2022 йилнинг январь ойидан буён ўзаро оилавий жанжал сабабли ажрашиб, бирга яшамасдан келган.
Шундан сўнг у турмуш ўртоғини ўзи билан бирга яшашга мажбур қилиб, рашк қилиб, бир неча маротаба жанжаллашган.
ЖКнинг 97-моддасида кўрсатилган жиноятни содир этган шахс 10 йилдан 15 йилгача озодликдан маҳрум қилиш билан жазоланади.
