5 май куни Халқаро футбол федерацияси (ФИФА) раҳбари Жанни Инфантино бошчилигидаги делегация Ўзбекистонга ташриф буюрди. Меҳмонлар мамлакатда футболни оммалаштириш йўлида олиб борилаётган ишлар билан яқиндан танишиш ҳамда футболни янада ривожлантиришга оид ҳамкорликни муҳокама қилиш учун келган.
Ўша куни ФИФА раҳбари Шавкат Мирзиёев қабулида бўлди. Аввалроқ унинг президент Шавкат Мирзиёевга фамилияси ҳамда 24 рақами туширилган футболка тортиқ қилгани ҳақида ёзгандик.
6 май куни унинг эрта тонгдан Тошкент бўйлаб амалий ташрифлари бошланди. Дастлабки манзил Ўзбекистон футбол ассоциацияси бўлди.
ФИФА президенти бошчилигидаги делегация ЎФА биносини кўздан кечириб, сўнг GrassRoots яшил майдонидаги ёш футболчилар билан саломлашди. Сўнг уларга омад тилаб, футболчиларга тўп тақдим қилди. Шунингдек, раҳбар спортчиларнинг тўплари ва футболкаларига дастхат қўйиб берди.
ФИФА президенти Тошкент вилоятида жойлашган «Дўстлик» стадионига ҳам бориб, терма жамоалар машғулот маркази лойиҳаси билан танишди ва унинг қурилишига ҳисса қўшди. Шундан сўнг яқиндагина Осиё чемпиони бўлган U-20 терма жамоаси аъзолари билан кўришди. Уларга тилак билдириб, Аргентинада ўтадиган жаҳон чемпионатида омад тилади. Учрашув сўнгида жамоавий суратга тушилди. U-20 терма жамоаси ФИФА раҳбарига 9-рақамли либос совға қилди.
Фото: Tribuna.uz
«Сизларни U-20 Осиё чемпионатида ғолиб бўлганингиз ва жаҳон чемпионатига йўл олганингиз билан табриклайман. Жаҳон чемпионати — ўзига хос жараён. Бу барча футболчилар ва ёш мураббийларга жуда ҳам катта тажриба бўлади. Яқинда Аргентинага борасиз. Улар яқинда Қатарда жаҳон чемпиони бўлди. Сизлар жаҳон чемпионатининг очилиш учрашувида Аргентинага қарши беллашасиз. Сизлар аллақачон мамлакатингиз фахрига айландингиз. Барчангизни ЖЧда кутаман ва фақат 20 ёшлилар ўртасида эмас, балки катталар ўртасидаги ЖЧда ҳам иштирок этишингизга умид қиламан», — дея таъкидлади ФИФА президенти.
Журналистларга берган интервьюсида у U-20 Осиё чемпионатини телевизор орқали томоша қилганини, учрашув зўр ўтгани ва мухлислар билан тўлган стадион унда катта таассурот қолдирганини айтди. Стадионнинг атмосферасини кўриб, сиз бутун мамлакат жамоани қўллаб-қувватлаётгани, бу орқали жамоани руҳлантираётганини ҳис қиласиз. Ўйлайманки, биз энди ФИФА жаҳон мусобақаларини тезроқ Ўзбекистонга олиб келишимиз керак, дея таъкидлади у.
