АҚШнинг Ўзбекистондаги элчиси Жонатан Ҳеник «Муштум» журналини 100 йиллик юбилей билан табриклаш мақсадида 1 май куни журнал таҳририятига ташриф буюрди. Бу ҳақда нашрнинг Telegram каналида хабар берилди, шунингдек, элчихона саҳифаларида ҳам ахборот берилди.
Учрашув чоғида Жонатан Ҳеник «Муштум»нинг мухлиси эканлигини, элчихона журналга обуна бўлганини, унинг ҳар бир сонини мунтазам кузатиб боришини таъкидлаган. Шунингдек, у нашр тарихи, иш жараёни ва ходимлар билан яқиндан танишган.
2007 йилдан буён «Муштум»га бош муҳаррирлик қилаётган Носиржон Тошматовнинг «Газета.uz» мухбирига маълум қилишича, АҚШ элчиси таҳририятга кутилмаганда келган — улар буни ҳатто тасаввур ҳам қилмаган эди.
Фото: АҚШнинг Ўзбекистондаги элчихонаси
«Элчини биз таклиф қилганимиз йўқ, уларнинг ўзи ташриф буюрди. «Муштум»га элчихона обуна бўлган экан ва Telegram-каналимизни ҳам кузатиб боришаркан. «Бир қарашда тушунадиган карикатураларни кўриб, ҳам куламан, ҳам мулоҳаза қиламан. Мен тушунмаган карикатураларни ва ҳажвияларни таржимонларга илтимос қилсам, тушунтириб беришади. Журнал савияси жуда юқори ва унда бериб бориладиган материаллар мазмунли. Бу ерга журнал мухлиси бўлганим учун ва «Муштум»нинг юбилейи билан табриклагани келдим», деди элчи», — дейди Носиржон Тошматов.
Фото: АҚШнинг Ўзбекистондаги элчихонаси
Унинг сўзларига кўра, дипломат журналда фаолият юритувчи рассомлар ижоди билан ҳам яқиндан танишган.
«Муштум»нинг фаолиятини ривожлантириш масаласида ҳам фикрлашдик. Биз режаларимизни айтдик. Элчихона ижодий ҳамкорликка ва ёрдамга ҳамиша тайёр эканлигини таъкидлади. Журналнинг 100 ёши билан табриклаб, таҳририят жамоасига совғалар улашди. Биз ҳам уларни қуруқ қўл билан қайтаргимиз келмай, оз бўлса-да совға бердик. Бундан ташқари, „Муштум“ рассоми Ҳусан ака Содиқов элчи Жонатан Ҳеникнинг карикатурасини чизган эди, уни рамкага солиб, туҳфа қилдик. Ўзини кўриб, роса кулди», — дейди журнал муҳаррири.
Элчи Жонатан Ҳеник «Муштум» рассоми Ҳусан Содиқов томонидан чизилган шаржаси билан. Фото: АҚШнинг Ўзбекистондаги элчихонаси
Носиржон Тошматовнинг қайд этишича, элчи ва жамоанинг суҳбати чой устида очиқ-ойдин ва самимий кечган. «Унга: „Ўзбекистон маданият вазири ёки молия вазири таҳририятга келганида, бунчалик хурсанд бўлмасдик. Сиз журнал мухлиси сифатида юбилей билан табриклагани келганингиздан бошимиз осмонга етди“, дедим», — дея қўшимча қилди бош муҳаррир.
Носиржон Тошматов 2022 йилдан буён «Муштум» юбилейини ўтказиш бўйича бир қанча масъул ташкилотларга хатлар ёзиб, мурожаат қилиб келади.
«Аммо шу пайтгача журналнинг 100 йиллик тўйи нишонлангани ҳам, бирор амалдор табрик сўзи ёзгани ҳам йўқ. Агар президент эртага „Муштум“ юбилейи нима бўляпти, деб сўраб қолса, таҳририятимизга кўплаб масъул амалдорлар келади, эҳтиром кўрсатади. Афсуски, раҳбарият топшириқ берсагина, бирор ишни бажарадиган даражага етиб келдик. Ҳамма нарса давлат раҳбарини ўзига юклаб қўйиляпти. У айтса қилинади, гапирмаса — йўқ», — дейди журналист.
Носиржон Тошматов 2023 йил февралида «Газета.uz»га берган интервьюсида ҳам «Муштум»нинг 100 йиллик тўйини қандай ўтказиш ҳақидаги таҳририят режалари билан ўртоқлашган, бироқ бу режалар қўллаб-қувватланмаётганини таъкидлаб ўтганди.
