Ўзбекистоннинг АҚШдаги фавқулодда ва мухтор элчиси сифатида иш бошлаган Фурқат Сидиқов Қўшма Штатлар президенти Жо Байденга ишонч ёрлиқларини топширди. Элчи бу ҳақда ўзининг Twitter саҳифасида маълум қилди.
«Ишонч ёрлиғимни топшириш маросимида суратга тушдим. Президент Жо Байден билан учрашиш катта шараф. Мен халқларимиз ўртасидаги дўстлик ва ҳамкорликни мустаҳкамлаш, стратегик шериклигимизни янада мустаҳкамлашга интиламан», — дейди дипломат.
Эслатиб ўтамиз, 4 апрель куни Фурқат Сидиқов мамлакат протокол раҳбари Руфус Гиффорд билан учрашиб, унга ишонч ёрлиқларини топширганди.
3 март куни Олий Мажлис Сенати Ўзбекистоннинг АҚШдаги элчиси лавозимига 2022 йил ноябридан буён ташқи ишлар вазирининг биринчи ўринбосари лавозимида ишлаган Фурқат Сидиқов номзодини маъқуллаганди.
2017 йилдан буён Ўзбекистоннинг АҚШдаги дипломатик ваколатхонасига (бир вақтнинг ўзида Канада ва Бразилиядаги элчи лавозимида ҳам ишлаган) Жавлон Ваҳобов раҳбарлик қилиб келганди. У яқинда Тошкентга қайтган.
Фурқат Сидиқов 1971 йил 7 февралда Тошкентда туғилган. 1993 йилда Тошкент давлат техника университетини тамомлаган. UzDaewoo Electronics ҚКда бош мутахассис (1993−1995), президент ҳузуридаги Стратегик ва минтақавий тадқиқотлар институтида ходим, катта илмий ходим, етакчи илмий ходим (1995−2002, 2007−2011) лавозимларида ишлаган.
Шунингдек, Ўзбекистоннинг АҚШдаги элчихонасида атташе (2002−2007), ушбу элчихонанинг биринчи котиби (2011−2015), Ўзбекистоннинг Покистондаги элчиси (2015−2020) лавозимларида ишлаган.
