Тошкентдаги Халқаро қишлоқ хўжалиги университетида 25 апрель куни АҚШ Халқаро тараққиёт агентлиги (USAID) ва Ўзбекистон Қишлоқ хўжалиги вазирлиги ҳамкорлигида Ер кунига бағишланган тадбир ўтказилди. Бу ҳақда «Газета.uz» мухбири Миролим Исажонов хабар бермоқда.

Унда АҚШнинг Ўзбекистондаги элчиси Жонатан Ҳеник, USAIDнинг Ўзбекистондаги миссияси директори Микаэла Мередит, университет ректори Мунира Аминова иштирок этиб, «Глобал даражада ўйла, маҳаллий даражада ҳаракат қил» мавзусидаги экологик ғоялар танлови ғолибларини тақдирлади.

Тадбирда нутқ сўзлаган АҚШ элчиси Жонатан Ҳеникка кўра, иқлим ўзгаришига қарши курашиш ва табиатни асраш фақат ҳукуматларнинг иши эмас. Бу борада барча ташкилот ва фуқаролар биргаликда ҳаракат қилиши зарур.

«Менимча, Тошкентда ҳаво сифати ёмонлашгани ҳеч бирингиз учун ажабланарли эмас. Қиш ва ёз фасллари борган сари кескинлашаётганини кўряпмиз. Қиш совуқроқ, ёз иссиқроқ бўляпти. Бу эса, биласиз, атроф-муҳитга етказилаётган зарар оқибатидир. Табиат ва ерни ҳимоя қилиш учун барчамиз биргаликда ва кўпроқ ҳаракат қилишимиз керак. Биз Ўзбекистон ҳукумати билан иқлим ўзгаришига қарши курашиш ва унга мослашиш бўйича яқин ҳамкорликда ишлар олиб боряпмиз. Аммо бу борада фақат ҳукуматларнинг чора-тадбирлар кўриши ёки курашиши етарли эмас, албатта. Атроф-муҳитга ғамхўрлик қилиш учун ҳар биримиз кўпроқ ҳаракат ва намунали ишлар қилишимиз керак», — деди у.

Жонатан Ҳеникнинг қайд этишича, ҳар бир фуқаро атроф-муҳитни асрашга ўз ҳиссасини қўшиши керак. Элчининг ўзи second-hand кийимлар сотиб олишини таъкидлади.

«Биз нафақат Ер кунида, балки ҳар куни табиатни асраш учун намунали ишларни қилишимиз лозим. Мисол учун, ўзим деярли барча кийимларимни second-hand`дан (фойдаланилган кийимлар назарда тутилмокда — таҳр.) харид қиламан, бу одатга айланган. Яъни Америка Қўшма Штатларидаги кийим-кечак дўконларидан фойдаланаман. Сизлар бундан ҳам кўпроқ нарсаларни қила оласиз. Масалан, чироқларни, кондиционер ва бошқа иситиш техникаларидан фойдаланишда электр энергияни тежашингиз, маҳаллий табиий маҳсулотларни истеъмол қилишингиз мумкин. Шу орқали табиатни асрашга ҳисса қўшган бўласиз», — деди элчи.