Тошкент шаҳри Ички ишлар бош бошқармаси ижтимоий тармоқларда 3 яшар қизнинг ўлими ҳолати юзасидан тарқалган видеомурожаат юзасидан муносабат билдирди.

25 апрель куни 1996 йилда туғилган Д.У. Сергели тумани ИИОга ариза билан мурожаат қилган. Унда синфдоши — 1996 йилда туғилган Ш. Н.га 2020 йилда туғилган фарзанди С.У.ни энагалик қилиши учун топширганини, лекин боласи унинг хонадонида вафот этганини маълум қилган.

Текширув жараёнида Ш. Н. қиз 24 апрелда ертўлага тушиш зинасидан йиқилиб тушганини, лекин ўрнидан туриб, яна ўйнаб кетгани сабабли унинг онасига бу ҳақда хабар бермаганини айтган. Аёл шифокорларга болага тиббий ёрдам кўрсатиш учун мурожаат ҳам қилмаган.

25 апрель куни тахминан соат 10:00 атрофида эса С.У. хушидан кетиб йиқилган ва тез тиббий ёрдам ходимлари келгунига қадар вафот этган. Марҳуманинг ўлим сабабини аниқлаш мақсадида судга оид тиббиёт экспертизаси тайинланди.

Ҳолат юзасидан туман ИИО ФМБ томонидан Жиноят кодексининг 117-моддаси (Хавф остида қолдириш) билан жиноят иши кўзғатилган. Гумон қилинувчи Ш. Н. процессуал тартибда ушланган. Ҳозирда тергов давом этмоқда, дейилади хабарда.