Германияда 15-апрелдан 16-апрелга ўтар кечаси охирги учта атом электр станцияси электр тармоғидан узилди, деб хабар бермоқда BBC. Расмий Берлин буни Европанинг баъзи бошқа давлатлари, жумладан Франция, атмосферага зарарли чиқиндиларни камайтириш, электр энергиясини арзонлаштириш ва Россия энергия ташувчиларига қарамликни камайтириш умидида атом энергетикасига сармояларни кўпайтираётган бир пайтда амалга оширди.
Германиядаги барча АЭСларни 2022-йилга қадар ёпиш тўғрисидаги қарор кўп йиллар аввал, зилзила ва цунами оқибатида жиддий зарар кўрган Япониядаги Фукусима атом электр станциясидаги авариядан кўп ўтмай қабул қилинган эди.
Экологик фаоллар ва ҳукмрон «яшиллар» коалиция аъзолари атом станциялари хавфи ва радиоактив чиқиндиларни сақлаш билан боғлиқ муаммоларни айтиб, АЭСларни ёпишни талаб қилганди. Бироқ, аҳолининг аксарияти (65%) атом электр станциясидан воз кечишга қарши чиққанди.
Атом энергиясидан воз кечишнинг сўнгги муддати Россия Европага газ етказиб беришнинг кескин қисқартиргани сабаб 2022-йил охиридан 2023-йил апрелига кўчирилганди.
Ўтган йили охирги учта атом электр станцияси мамлакатдаги электр энергиясининг атиги 6 фоиз ишлаб чиқарилган. Таққослаш учун, 1997-йилда атом электр станциялари Германиянинг электр энергиясига бўлган эҳтиёжининг 30,8 фоизини таъминлаган.
Расмийларнинг таъкидлашича, энергетика билан боғлиқ вазият тўлиқ назорат остида ва атом электр станциялари вақт ўтиши билан демонтаж қилинади. Уларнинг эслатишича, немис газ омборлари максимал даражада тўлдирилган ва суюлтирилган газни қабул қилиш учун барча зарур инфратузилма яратилган. Бу эса Россиядан газ импортини ўрнини босади.
Шанба куни Greenpeace вакиллари Берлиндаги Бранденбург дарвозасида «Атом энергияси ниҳоят тарихнинг бир қисмига айланди!» шиори билан митинг ўтказди. Бошқа шаҳарларда ҳам учта атом электр станциясининг ёпилиши нишонланди.
«Келажак атом энергияси билан боғлиқ эмас. Келажак қайта тикланадиган энергия манбаларига тегишли. Бу бизнинг келажагимиз бўлади. Мюнхенда 2008-йилдан бери биз фақат қайта тикланадиган энергия манбаларидан фойдаланишни кенгайтиришга эътибор қаратдик», — деди Мюнхен мери Дитер Райтер (Euronews иқтибоси).
Германиянинг энергия таъминотида қайта тикланадиган манбаларнинг улуши аллақачон 40 фоиздан ошди. Greenpeace фаолларининг таъкидлашича, технология ривожланиши расмийлар кутганидан тезроқ содир бўлди.
BBCнинг қайд этишича, Европадаги айрим давлатлар бутунлай бошқа йўлдан бормоқда. Ўтган йилнинг бошида Франция президенти Эммануэл Макрон 6 дан 14 тагача янги реактор қуришга ваъда берган эди, улардан биринчиси 2035-йилгача ишга туширилиши керак, шунингдек, мавжудларининг максимал ишлаш муддатини 40 йилдан 50 тагача узайтирилиши мумкин.
Европанинг Германиядан кейин иккинчи йирик иқтисодиёти бўлган Францияда атом энергияси электр энергиясига бўлган эҳтиёжнинг 70 фоизини қоплайди ва бу мамлакатни, асосан, Италия ва Буюк Британияга энергия экспорт қилувчи йирик давлатга айлантирди.
