Фарғона вилоятининг Қўштепа туманида оилавий жанжал туфайли келинининг бошини кесиб ташлаган 65 ёшли қайнотага нисбатан суд ҳукми ўқилди. Бу ҳақда Олий суд матбуот котиби Азиз Абидов «Газета.uz»га маълум қилди.
Воқеа 2022 йил 1 октябрь куни Қўштепа туманининг Ҳумдон маҳалласидаги хонадонлардан бирида содир бўлган.
Таъкидланишича, 1958 йилда туғилган қайнота И.Р. келини К.Г. нинг кечки овқатни тайёрлаётганини кўриб, унга таомни мазалироқ тайёрлашини айтган. Келин бўлса қўлидан келганича овқат қилиши, у қандай чиқишидан қатъи назар ейишларини айтади. Шундан сўнг аёл эшикни қарсиллатиб ёпиши натижасида унинг ойналари синиб кетган. Қайнота «келиннинг жаҳлдор муносабати туфайли» ғазаби қўзиб, ошхонага кирган ва келинининг бўйнига қўли билан зарб билан уриши натижасида аёл ҳушини йўқотиб, ерга йиқилган.
Шундан сўнг, қайнота ҳушсиз ётган келинини уйда ҳеч ким йўқлигидан фойдаланиб, ўз ҳовлисидаги Матиз машинасига ётқизиб, Фарғона тумани Оқбулоқ қишлоғидаги адирликка олиб борган. Шундан сўнг, у ошхона пичоғи билан келинининг бош қисмини танасидан буткул ажратиб олган ва йўл четида жойлашган арча дарахти орасига илиб кетган.
Суд-тиббий экспертизасининг хулосасига кўра, марҳума оғир тан жароҳати олгани ва кўп қон йўқотгани оқибатида вафот этган.
Жиноят ишлари бўйича Қўштепа туман суди томонидан 2023 йил 23 февраль куни айбланувчига нисбатан суд ҳукми ўқилди. Судланувчи Жиноят кодексининг 97-моддаси 2-қисми (Жавобгарликни оғирлаштирадиган ҳолатларда қасддан одам ўлдириш) «в» банди (айбдорга аён бўлган ожиз аҳволдаги шахсни) ва 134-моддаси 1-қисми (Қабрни ёки мурдани таҳқирлаш, шунингдек мурдадаги, қабр устидаги ёки ичидаги нарсаларни олиш) билан айбли деб топилди. У Жиноят кодексининг 59-моддаси 3-қисми (Бир неча жиноят содир этганлик учун жазо тайинлаш)га асосан, тайинланган жазолар қисман қўшилиб, узил кесил ўташлик учун 13 йил 2 ой муддатга озодликдан маҳрум этилди. Жазони умумий тартибли колонияда ўташ белгиланди.
