Ўзбекистон халқ артисти, актёр Мурод Ражабов узоқ давом этган қанд касаллигидан сўнг 74 ёшида вафот этди. Бу ҳақда Кинематография агентлиги хабар берди.

Ўзбек киносининг «Темир эркаги» дея эътироф этиладиган Мурод Ражабов 1949 йилнинг 30 март куни Тошкент шаҳрида таваллуд топган. 1971 йили собиқ Тошкент театр ва рассомлик институтини тамомлаган. У 1973 йили «Оловли соҳил» фильмидаги кичик роли билан санъат оламига кириб келган.

У фаолияти давомида «Ажойиб хаёлпараст», «Тўйлар муборак», «Оловли йўллар», «Тангалик болалар», «Темир хотин», «Темир эркак», «Кичкина табиб», «Шайтанат», «Сарвиноз», «Улфатлар», «Супер келинчак», «Севгинатор» сингари юзлаб фильмларда суратга тушган.

Мурод Ражабов «Пари момо», «Улфатлар», «Анора», «Улфатлар-2», «Бир келиб кетинг қишлоғимизга», «Улфатлар-3 ёхуд улфатлар Таиландда» фильмларига режиссёрлик қилган.

1978 йилда «Бу Қўқонда бўлган» телефильмидаги роли учун Ҳамза номидаги Ўзбекистон ССР Давлат мукофоти билан тақдирланган. 2008 йилда Ўзбекистон халқ артисти унвонига лойиқ кўрилган.