Тошкентдаги Юнусобод тез тиббий ёрдам подстанцияси фельдшери, бу ерда етти йилдан буён ишлаб келаётган ва ушбу ҳудудда кўпчиликка таниш бўлган Злата Гафурова ўзининг Facebook саҳифасида беморнинг қариндоши томонидан таҳдидлар бўлганини маълум қилди. Унинг таъкидлашича, онаси учун тез ёрдам чақирган эркак фақат аёл тиббиёт ходимлари келишини талаб қилган.
Злата Гафурованинг блогер Ислам Капарзога билдиришича, подстанцияда ундан диспечер ўрнини эгаллаб туришни сўрашган. Навбатчилик вақтида бўлган қўнғироқда эркак киши онасининг юраги оғирлашиб қолгани, бироқ унга тиббий ёрдам кўрсатиш учун аёл шифокорлар жўнатилишини талаб қилган. Злата тез тиббий ёрдам кўрсатиш бўйича ички қоидаларда чақирувчининг талаби бўйича шифокор жўнатиш қисми йўқлигини маълум қилган.
Ўша вақтда бўш аёл шифокорлар бригадаси ҳам бўлмаган. Гафурова бу ҳақда қўнғироқ қилган шахсни огоҳлантириб, ё кутиш кераклигини ёки энг яқин бригада келишини айтган. Унинг сўзларига кўра, қўнғироқ қилган киши бунга рози бўлиб: «Нима ҳам қилардик, ким бўлса ҳам келсин», — деган.
Бироқ воқеа жойига эркак шифокорлар бригадаси етиб келганида, қўнғироқ қилган шахс уларни уйга киритмай, электрокардиография аппаратини олиб қолмоқчи бўлган. Уларнинг ёнида, фельдшернинг сўзларига кўра, унга ҳам қўнғироқ қилиб, одобсиз сўзлар билан ҳақорат қила бошлаган ва: «Ёриб ташлайман, бориб, сени топаман», — дея қўрқитган.
Кейинчалик, беморга аёл шифокор бўлган бошқа бир гуруҳ келади. Шифокорлар ҳаёт учун хавфли ҳолатни аниқламайди ва касалхонага ётқизиш шарт эмас деган хулоса беради. Злата Гафурова биринчи тез ёрдам машинаси 17 дақиқада етиб боргани, иккинчиси учун эса бир соатдан кўпроқ вақт кетганини таъкидлади.
Бундан ташқари, Злата Гафурованинг сўзларига кўра, тунги соат бирларда ички ишлар органлари ходимлари подстанцияга қўнғироқ қилган ва улар устидан шикоят келиб тушганини, яъни диспетчер «нотўғри тез ёрдам бригадасини» юборганини айтишган. Ундан ГОМга (шаҳар ИИБ бўлими) келишни сўрашди. Қиз таҳдид ва ҳақоратлар ҳақида қарши ариза ёзган.
Орадан бир неча кун ўтиб Злата Гафурованинг олдига квартал участка нозири қўнғироқ қилади. У нима бўлганини айтиб беришни сўрайди ва сўнгра унга қарши аризани қайтариб олишни маслаҳат беради, акс ҳолда фельдшер 12 млн сўм миқдорида жаримага тортилишини айтади. Қайси хатти-ҳаракатлари учун жарима тўлаши кераклиги сўралганда, туман ИИБ ходими жавоб бермайди.
Кўп ўтмай участка нозирининг олдига тез ёрдам чақирган эркак ҳам етиб келади. Фельдшернинг сўзларига кўра, у ўша ерда ҳам: «Ҳамма жойда таниш-билишларим бор — бутун умрга ишингдан учиб кетасан», — дея таҳдид қилади.
