Исроил бош вазири Биньямин Нетаньяху оммавий норозилик намойишлари ва иш ташлашлар фонида суд-ҳуқуқ тизимини ислоҳ қилиш лойиҳаларини тўхтатди, деб хабар берди BBC News.
«Миллий бўлинишнинг олдини олиш мақсадида мен кенг консенсусга эришиш учун қонун лойиҳасининг иккинчи ва учинчи ўқишларини кейинга қолдиришга қарор қилдим», — деди у 27 март куни телемурожаатида.
Исроилда ҳукумат томонидан илгари сурилган суд ислоҳотига қарши намойишлар деярли уч ой давом этди. Ўтган ҳафта парламентда қонун лойиҳаси бўйича кутилаётган овоз бериш арафасида тартибсизликлар кучайди.
26 март куни Нетаньяху суд-ҳуқуқ ислоҳотларини очиқ танқид қилган мудофаа вазири Йов Галантни ишдан бўшатди. Галант ишдан бўшатилгандан сўнг, ўн минглаб одамлар бутун мамлакат бўйлаб Исроил кўчаларига чиқди, полиция одамларни тарқатиш учун сув тўпларидан фойдаланди.
Шунингдек, мамлакатдаги ислоҳотга норозилик сифатида иш ташлаш ҳам эълон қилинди, унга шифокорлар, транспорт ходимлари, давлат хизматчилари, банкирлар ва хусусий компаниялар ходимлари қўшилди. Иш ташлашлар фонида Исроилнинг энг йирик аэропорти Бен-Гурион ва йирик портлар ишламай қолди.
Нетаньяху нутқидан сўнг Ҳистадрут касаба уюшмалари федерацияси ва маҳаллий кенгашлар умумий иш ташлашни тўхтатганини эълон қилди.
Суд-ҳуқуқ ислоҳотининг моҳияти нимада?
Биньямин Нетаньяху жорий йилнинг январь ойида сайловда ғалаба қозонганидан сўнг суд-ҳуқуқ ислоҳотларини амалга ошириш режасини эълон қилди. Унинг асосий мақсади Олий суд ваколатларини заифлаштиришдан иборатдир. Хусусан, ислоҳот қуйидагиларга қаратилган эди:
- Олий суднинг мамлакат конституцияси вазифасини ўтайдиган Исроил Асосий қонунларининг қонунийлигини текшириш ваколатини олиб ташлаш ва парламентга кўпчилик овоз билан Олий суд қарорларини бекор қилиш ваколатини бериш;
- Олий суд судьяларини тайинлашда ҳукуматга ҳал қилувчи овоз бериш орқали сайланиш усулларини ўзгартириш.
Ислоҳот танқидчилари нима дейишмоқда?
Ислоҳот танқидчилари суд-ҳуқуқ ислоҳоти мамлакатда демократия ва қонун устуворлигига путур етказади, деб таъкидламоқда.
«Исроил Олий суди назорат ва мувозанатнинг катта ролини ўйнайди, чунки мамлакатда расмий конституция ёки иккинчи қонунчилик палатаси мавжуд эмас», дея қайд этади The Guardian.
Танқидчилар коррупция иши бўйича айбланаётган Нетаньяху ўзини жиноий таъқиблардан ҳимоя қилиш ва бош вазирликни сақлаб қолиш учун ислоҳотларни ўтказишга уринаётганига эътибор қаратмоқда.
Энди нима бўлади:
Хорижий ва Исроил ОАВлари Нетаньяхунинг қарори унга вақт беришини ёзмоқда. «Аммо бу муаммони ҳал қилмайди. Намойишчилар ушбу қонун лойиҳасини кечиктириш учун эмас, балки бекор қилиш учун курашдилар «, — дея таъкидлайди BBC.
Шу билан бирга, Нетаньяху ҳукумати таслим бўлишни режалаштирмаяпти ва ислоҳотни якунига етказмоқчи. «Биз ақллироқ бўлишимиз керак. Биз қонунни кейинроқ қабул қиламиз», — дея адлия вазири Ярив Левин сўзларидан иқтибос келтирган Times of Israel.
