Россия президенти Владимир Путин ва Хитой раҳбари Си Цзинпин 21 март куни Москвада бўлиб ўтган музокараларда Марказий Осиё минтақасига алоҳида эътибор қаратилди. Бу давлатларнинг «Янги даврда ҳар томонлама шериклик ва стратегик ҳамкорликни чуқурлаштириш тўғрисидаги қўшма баёноти»да келтириб ўтилган.
«Томонлар Марказий Осиё давлатларининг суверенитети ва миллий тараққиётини таъминлашда қўллаб-қувватлаш бўйича ўзаро мувофиқлаштиришни кучайтиришга тайёр, «рангли инқилоблар»ни импорти ва минтақа ишларига ташқи аралашувга йўл қўймайди», — дейилади баёнотда.
Томонлар, шунингдек, «Коллектив хавфсизлик шартномаси ташкилотининг минтақавий хавфсизликни таъминлашга қўшаётган ижобий ҳиссаси» ҳамда «минтақада тинчлик ва барқарорликни таъминлаш мақсадида» КХШТ ва ХХР ўртасидаги ҳамкорликни ривожлантириш салоҳиятини қайд этдилар.
2022 йил февраль ойи бошида Владимир Путин Пекинга ташриф буюрганида икки давлат қўшма баёнотида, Россия ва Хитой «ташқи кучларнинг умумий қўшни минтақаларда хавфсизлик ва барқарорликка путур етказиш ҳаракатларига» қарши экани, шунингдек, «суверен мамлакатларнинг ички ишларига ҳар қандай баҳона билан ташқи кучларнинг аралашувига қаршилик кўрсатиш, рангли инқилобга қарши туриш» ниятида экани қайд этилганди.
Си Цзинпин уч кунлик давлат ташрифи билан Москвада бўлди. Бу унинг Хитой раҳбари этиб учинчи муддатга қайта сайланганидан кейин хорижга биринчи сафари эди.
