UzAssets инвестиция компанияси Ўзбекистондаги «Электрқишлоққурилиш» компаниясини хусусийлаштириш бўйича келишувга эришилганини маълум қилди.
Корхонанинг 58,41% давлат улуши Россиянинг Урал энергетика қурилиш компаниясига (Уральская энергетической строительная компания, УЭСК) сотилмоқда. Харидор ушбу актив учун 93,2 млрд сўм таклиф қилган (Марказий банкнинг 15 мартдаги курси бўйича 8,14 млн доллар).
«Электрқишлоққурилиш» компаниясининг давлат улуши 2021 йил ноябрь ойида сотувга қўйилган. Битим бўйича маслаҳатчи сифатида Grant Thornton халқаро компанияси жалб қилинган, Dentons эса ҳуқуқий ёрдам кўрсатган.
Объектга инвесторлардан жами 7 та ариза келиб тушди. Улар суд жараёнининг, шунингдек, Европа Иттифоқи, АҚШ ва халқаро молия институтларининг санкциялари йўқлиги бўйича ўрганилди.
Якунда УЭСК таклифи «энг яхшиси» деб топилган. У таклиф қилган нарх параметрлари маслаҳатчи томонидан ҳисобланган харажатларнинг индикатив диапазонида ва мустақил баҳолаш натижаларидан ошиб кетган. UzAssets Россия компанияси келгусида «Электрқишлоққурилиш»нинг барқарор ривожланишини сақлаб қолиши ва турли кучланишли электр тармоқлари объектларини қуриш бўйича йирик саноат корхоналаридан бирига айланишини кутмоқда.
Компания ҳақида
Spot нашрининг ёзишича, «Электрқишлоққурилиш» 1936 йилда қишлоқ хўжалигини электрлаштириш бўйича ихтисослаштирилган трест сифатида ташкил этилган. 1998 йилда акциядорлик жамиятига айланди.
Эндиликда компания Марказий Осиёда 0,4 кВ дан 500 кВ гача кучланишли электр тармоқлари объэктларини қуриш бўйича бош пудратчи ўрнини эгаллайди. У Лукойл, «Лукойл», Hyundai Engineering, Hengyuan Group ва бошқалар учун электр ишларини бажарган.
Корхонанинг бизнес тузилмаси Наманган темир конструкциялари заводи, Қувасой бетон буюмлари заводи, Тошкентдаги ишлаб чиқариш-технологик асбоб-ускуналар бошқармаси, арматура, метиз ишлаб чиқариш ва бошқаларни ўз ичига олади.
