Ўзбекистон терма жамоаси аъзоси Янина Кускованинг Италияда велошоссе бўйича ўтказилган Trofeo Ponente in Rosa кўпкунлик пойгасидаги иштироки ниҳоясига етди, дея хабар бермоқда Миллий олимпия қўмитаси матбуот хизмати.
Якунловчи бешинчи босқичда Кускова учинчи бўлиб марра чизиғини кесиб ўтди. Бу натижа орқали у мусобақани умумий ҳисобда иккинчи ўринда якунлади.
Шунингдек, спортчи мусобақанинг «Энг яхши ёш пойгачиси» йўналишида ҳам ғалаба қозонди ва Париж-2024 Олимпиадаси йўлланмаси учун рейтинг очколарини ўз ҳисобига ёзиб қўйди.
Эслатиб ўтамиз, аввалроқ Янина Кускова Хорватияда ўтказилган Porec Trophy Ladies турнирида олтин медални қўлга киритганди.
