Uzbekistan Airways бошқарув раиси этиб Худайкулов Шухрат Шавкатович тайинланди, дея хабар қилди миллий авиаташувчи матбуот хизмати.
Бу Uzbekistan Airways компаниясининг ягона ационери — Ўзбекистон президенти ҳузуридаги Стратегик ислоҳотлар агентлигининг 10 мартдаги қарорида кўзда тутилган.
Шухрат Худайкулов 2019 йилдан буён авиакомпанияда тижорат ва туризм бўйича бошқарув раиси ўринбосари лавозимида фаолият юритиб келаётган эди.
Шухрат Худайкулов 1984 йил 26 июл куни Урганчда таваллуд топган. Санкт-Петербург давлат фуқаро авиацияси университетининг «Авиация ташувларини ташкил этиш» мутахасислигини тамомлаган. Шухрат Худайкулов 2006 йил «Ўзбекистон ҳаво йўллари» МАК жамоасига келиб қўшилган ва ўз фаолиятини «Тошкент» ҳалқаро аэропортининг авиаташувларини ташкил этиш агенти сифатида бошлаган. 2006−2019 йиллар оралиғида «Ўзбекистон ҳаво йўллари» МАКда турли лавозимларда, жумладан авиакомпаниянинг хориждаги ваколатхоналари, миллий авиакомпаниянинг сотувлар департаменти директори сифатида фаолият юритган.
2021 йил февраль ойидан буён Uzbekistan Airways бошқаруви раиси лавозимини транспорт вазири Илҳом Маҳкамов эгаллаб келаётган бўлиб, у билан 2022 йил октябрида меҳнат шартномаси уч йилга узайтирилган эди.
AviaST (Россия) ҳаво қатнови ва сайёҳлик компанияси асосчиси, Vietnam Airlines авиакомпаниясининг Франция ва Европадаги минтақавий ваколатхонаси собиқ тижорат директори Зафар Хусаинов аввалроқ Kapital.uz мухбирига Чикаго конвенциясининг (Халқаро фуқаро авиацияси тўғрисидаги конвенция) Dос 8335-АN/879 иловасида авиация маъмурияти ва операторлар ўртасидаги муносабатлар белгилангани, унга кўра регулятор (Транспорт вазирлиги) ва оператор (авиакомпаниялар) функцияларини бирлаштиришнинг мумкин эмаслигини айтиб ўтган эди.
Бу ташкилотларнинг позициялари бирлаштирилган тақдирда операторлар ўртасида тенг рақобат нуқтаи назаридан манфаатлар тўқнашуви юзага келади ва парвозлар хавфсизлиги устидан назорат ҳам йўқолади, деган эди у.
Аудитда Халқаро фуқаро авиацияси ташкилоти (ИКАО) оператор ва тартибга солувчи ўртасидаги функцияларни ажратиш тизимини қатъий кўриб чиқади. Ажратишга риоя қилинмаган тақдирда, бошқа мамлакатларга парвозлар тақиқланиши мумкин.
