Хитой Ташқи ишлар вазирлиги матбуот котиби Мао Нин АҚШ давлат котиби Энтони Блинкеннинг Хитойнинг Украинадаги вазиятни тартибга солиш бўйича позицияси ҳақидаги баёнотига муносабат билдирди.
2 март куни Хитой ТИВ матбуот котиби навбатдаги брифингда Энтони Блинкеннинг Ўзбекистонга ташрифи чоғида айтган «Хитой иккала томонда ҳам ўйнай олмайди. У Владимир Путин ёққан олов алангасини ёқишда давом этар экан, ўзини тинчлик тарафдори бўлган куч сифатида кўрсата олмайди», шунингдек, «Хитой Россияга ҳарбий ёрдам кўрсатиш имкониятини кўриб чиқмоқда, бу эса ҳалокатларга сабаб бўлиши мумкин» каби сўзларига тўхталиб ўтди.
Унинг фикрича, айнан АҚШнинг ўзи Украинадаги урушни ҳалокатли қуроллар билан таъминлаб, аланга ёқиб, ҳамма ерда ёлғон маълумот тарқатмоқда.
«Хитой бунга кескин қарши. Хитой ҳар доим Украина масаласида холис ва адолатли позицияга амал қилган, тинчлик ва инқирозни сиёсий йўл билан ҳал этишга кўмаклашиш, доимо тинчлик ва мулоқот тарафдори», — дея қайд этди Мао Нин.
Вазирлик расмийсининг сўзларига кўра, Қўшма Штатлар суверенитет ва ҳудудий яхлитликни ҳурмат қилишини фақат оғзаки даъво қилади, лекин аслида бундай эмас. Шунингдек, ўз сиёсий мажбуриятларини бузган ҳолда Тайван масаласида қизил чизиқдан ўтишга ҳаракат қилади.
«Қўшма Штатлар тинчликни хоҳлашини даъво қилади, лекин улар бутун дунё бўйлаб урушларни келтириб чиқаради ва қарама-қаршиликни қўзғатади. АҚШ дунё тартибини сақлаш кераклиги ва бунга ҳурмат билан муносабатда бўлиш муҳимлигини таъкидлайди. Лекин улар ички қонунчиликни халқаро ҳуқуқдан устун қўйиб, ноқонуний бир томонлама санкцияларга мурожаат қилади. Қўшма Штатлар ўзини ҳалол рақобат тарафдоридек кўрсатади, аммо айнан АҚШ давлат ҳокимиятини суиистеъмол қилиб, бошқа мамлакатлардаги компанияларга ўзбошимчалик билан босим ўтказади ва шу билан халқаро савдо қоидаларини бузади», — дейилади вазирлик муносабатида.
Баёнотда АҚШ, биринчи навбатда, айбни ўзидан қидириши кераклиги, фактларни бузиб кўрсатишидан тийилиши, низо қўзғашдан кўра тинчликни тарғиб қилиши ва музокараларга киришишда масъулиятни ўз зиммасига олиши кераклиги таъкидлаб ўтилган.
Эслатиб ўтамиз, АҚШ давлат котиби Энтони Блинкен Ўзбекистонга ташрифи давомида матбуот анжуманида қатнашиб, Хитойнинг Украинадаги можарони ҳал қилиш бўйича таклифлари ҳақида ўз фикрлари билан ўртоқлашганди.
«У ерда [тинчлик режаси] баъзи ижобий жиҳатлар бор, жумладан, олдин Хитойнинг ўзи бир неча бор айтган сўзлари ёки Украинанинг ўзида мавжуд бўлган таклифлар. Аммо Хитой ҳақиқатан ҳам суверенитетнинг биринчи тамойилига жиддий қараганида эди, ўтган йили Украина суверенитетини тўлиқ тиклашни қўллаб-қувватлаган бўларди. Хитой эса бунинг тескарисини қилди, ўзи Россиянинг уруш ҳақидаги пропагандаси ва дезинформацияси тарғиботини олиб борди, халқаро ташкилотларнинг Россия манфаатлари йўлидаги фаолиятига тўсқинлик қилди. Айни пайтда, олдин маълумот берганимиздек, Хитой Россияга ҳарбий ёрдам кўрсатиш имкониятини кўриб чиқмоқда, бу эса ҳалокатларга сабаб бўлиши мумкин», — деганди АҚШ давлат департаменти раҳбари.
