Қозоғистон Россия томонидан ҳеч қандай хавф ёки таҳдидни ҳис қилаётгани йўқ, дея маълум қилди мамлакат ташқи ишлар вазири Мухтор Тлеуберди 28 февраль куни Остонада АҚШ давлат котиби Энтони Блинкен билан учрашуви якунлари бўйича ўтказилган матбуот анжуманида.
Қозоғистоннинг «Россия билан ҳам, Украина билан ҳам тарихий алоқалари» бор ва мамлакатлар иқтисодиёти узоқ вақтдан бери ўзаро боғланган, деди у.
«Ва шунинг учун мен аниқ ҳис қиляпманки, вазият биз учун, иқтисодиётимиз учун жуда оғир ва санкцияларнинг салбий оқибатларидан қочишга ҳаракат қилмоқдамиз. Қозоғистон Евроосиё иқтисодий иттифоқининг аъзоси ва Қозоғистон, Россия ва ушбу иттифоқнинг бошқа аъзолари ўртасида бизнинг божхона чегарамиз йўқ. Шунинг учун чегараларимиз ўртасида маҳсулот ва хизматларнинг ушбу эркин савдосини қандай таъминлашимиз мумкинлигини бошқариш баъзан жуда қийин», — деди ТИВ раҳбари.
«Шу билан бирга, биз Россия ёки бошқа хорижий компаниялар томонидан санкциялардан бўйин товлаш эҳтимолидан қочишга ҳаракат қиляпмиз», — дея ишонтирди у.
Мухтор Тлеуберди Қозоғистон ўз ҳудудидан Россияга қарши санкцияларни четлаб ўтиш учун фойдаланишга йўл қўймаслигини таъкидлаб ўтди, бироқ «бу бугун бизда Россия Федерациясидан хавф, хавф бор ёки бизда хавф борлигини англатмайди».
«Қозоғистон Россияни ўраб турган бошқа давлатлар қатори Евроосиё иқтисодий иттифоқи, КХШТ, МДҲ аъзоси. Шунинг учун биз Россия билан муносабатларни ушбу кўп томонлама тузилмалар доирасида фаолият юритувчи иттифоқ сифатида кўрамиз», — деди у.
Вазир, шунингдек, Россия ва Қозоғистон ўртасидаги тўлиқ делимитация қилинган чегара дунёдаги энг узун қуруқликдаги чегара эканлигини — унинг узунлиги 7500 км дан ортиқлигини таъкидлади. «Қозоғистон ўзининг кўп векторли ташқи сиёсатини амалга оширишда давом этмоқда ва бу орқали биз дунёнинг барча давлатлари билан ўзаро манфаатли ҳамкорлик ва муносабатларни таъминлаш мақсадида ўзаро тийиб туриш ва мувозанат тизимини сақлашга ҳаракат қилмоқдамиз», — деди Мухтор Тлеуберди.
Нефть экспорти бўйича Россиядаги қувурлар тармоғига боғлиқ бўлган Қозоғистон 2022 йилда Россия ҳудудини четлаб ўтиб, етказиб бериш ҳажмини оширди. Президент Қасим-Жомарт Токаев нефть экспортини диверсификация қилишга чақирди.
Июль ойида The Wall Street Journal Қозоғистон Россия билан муносабатларини қайта кўриб чиқишга қарор қилгани ва АҚШ, Туркия ва Хитойдан иттифоқчилар қидира бошлагани ҳақида хабар берган эди. Мамлакат савдо йўлларини диверсификация қилишни бошлади, мудофаа бюджетини оширди ва Туркия билан жанговар учувчисиз самолётлар ишлаб чиқариш бўйича келишиб олди, дейилади материалда.
