Ижтимоий тармоқларда Сергели туманида тез тиббий ёрдам хизмати ходими калтакланганлиги акс этган видео тарқалди. ИИББ ҳолатга аниқлик киритиб, воқеа 27 февраль куни тонг пайти туманнинг Сергели-4 даҳасида бўлганини маълум қилди.
Аниқланишича, аёл «103» рақамига қўнғироқ қилиб, тез-тиббий ёрдам кўрсатиш бригадасини чақирган. Тез-тиббий ёрдам хизмати фельдшери хонадонга кириб, уни бирламчи кўрикдан ўтказган. Бу пайтда унинг ёнида бўлган таниши (эркак киши) фельдшерни аёлга яхши қарамаётганини айтган ва унга куч ишлатиш билан таҳдид қилган.
Фельдшер ундан қочиб кўчага чиққан вақтида тез тиббий ёрдам машинаси ҳайдовчиси уни ҳимоя қилган. Аёлнинг таниши жамоат тартибини бузиб, ҳайдовчини урган ва тан жароҳати етказган. Ҳайдовчи олган тан жароҳатлари билан шифохонага ётқизилган.
Ҳолат юзасидан Сергели тумани ИИО ФМБ ҳузуридаги Тергов бўлими томонидан Жиноят кодексининг 277-моддаси (Безорилик) билан жиноят иши қўзғатилган. Тергов давом этмоқда.
