Пойтахтдаги Эски-Жува бозорида сотувчилик қиладиган икки аёл ўртасида жанжал юзага келиб, бири иккинчисининг қулоғини тишлаб, узиб олган. Бу ҳақда Тошкент шаҳри суди матбуот котиби Садоқат Аллаберганова «Газета.uz»га маълум қилди.
Таъкидланишича, аёллар ўртасидаги жанжалга анча вақтдан буён давом этиб келган келишмовчилик сабаб бўлган. Жанжал вақтида 29 яшар аёл қўшни савдо растасида сут маҳсулотлари савдоси билан шуғулланувчи 30 яшар ҳамкасбини дўппослаб, қулоғининг бир қисмини тишлаб, узиб олган.
Судга оид тиббиёт экспертизаси хулосасига кўра, 1993 йилда туғилган аёлга ўнг қулоқ солинчаги эзилиб йиртилган яраси, чап елка, чап болдир ички, ўнг сон ва ўнг болдир соҳалари қонталашлари, чап қўл 5-кафт суяги сатҳи, ўнг лунж ва ўнг товон соҳалари шилинмалари кўринишидаги баданнинг тузалмайдиган даражадаги хунуклашишига сабаб бўлган қасддан оғир шикаст етказилган. Таъкидланишича, у аёл муқаддам Маъмурий жавобгарлик тўғрисидаги кодекснинг 52-моддаси (Енгил тан жароҳати етказиш) 2-қисми билан айбдор деб топилиб, жарима жазосига тортилган.
Қулоғи тишланган аёл жанжал пайтида ҳамкасбига бир қанча жароҳат етказган. Экспертиза чап елка соҳаси қонталаши, пастки лаб ички шиллиқ қаватига қон қўйилиши кўринишидаги жароҳатларни соғлиқнинг қисқа муддатга ёмонлашувига олиб келадиган енгил шикаст деб топган.
Ҳамкасбининг қулоғини тишлаб олган аёл судда кўрсатма берди.
«Ўша куни эрталабдан савдо қилиш мақсадида иш жойимга келдим. Орадан бироз вақт ўтиб, ёнимга сотувчи ҳамкасбим ҳам келди. Бир неча соат вақт ўтганидан сўнг олдимизга харидор келди ва менинг маҳсулотим ёққанини айтди. Ҳамкасбим унга маҳсулотим Қашқадарёдан келиши, сифати яхши эмаслигини айтиб, харидорни қайтармоқчи бўла бошлади. Шеригим ўз маҳсулоти солинган қошиқни узатди. Қўлини ортга итариб юборганимдан сўнг у мени тепди. Сўнг эса у сочимга, мен эса унинг ёқасига ёпишдим», — дейди у.
Воқеанинг яна бир иштирокчиси бўлган 30 ёшли судланувчининг сўзларига кўра, у ўнг қулоғида кучли оғриқни ҳис қила бошлаган ва «қўйиб юбор» деб бақирган.
«Ўша ердаги бир аёл шеригимнинг устидан челакда сув сепгач, у тўхтади ва унинг юзига қараганимда оғзи қон эканини кўрдим. Шок ҳолатига тушиб, қулоғимга қўлим билан теккан вақтимда ўнг қулоғимнинг ярми йўқ эканини билдим, атрофдагилардан қулоғимнинг узилган қисмини қидиришни илтимос қилдим», — дейди аёл.
Қайд этилишича, жиноят ишлари бўйича Шайхонтоҳур тумани суди томонидан қулоғининг ярмидан айрилган аёл қасддан баданга енгил шикаст етказишда айбдор деб топилиб, базавий ҳисоблаш миқдорининг 5 баравари миқдорида жаримага тортилган. 1994 йилда туғилган аёлга эса 3 йил муддатга озодликни чеклаш жазоси тайинланган.
