Тошкент шаҳрининг Мирзо Улуғбек тумани Буюк Ипак йўли кўчасида жойлашган Milavitsa брендининг ички кийимлар дўкони ташқи витринасидаги моделлар сурати интернетда танқид қилинган видео тарқалди. Шундан сўнг дўкон моделлар суратларини олиб ташлади.
Видеони суратга олган шахс туман раҳбарларига мурожаат қилиб, «бу йўлдан уларнинг вояга етмаган болалари ҳам ўтишини» айтган.
«Мана бунга аҳамият беринг. Яхшилаб қаранг. (Болаларнинг — таҳр.) кўзларини тезроқ очилсин деб бунга рухсат бердингларми? Тўртинчи, бешинчи синф ўқувчилари шу ердан ўтади. Бунга чора кўрасизларми?», — дейди у видеода.
Кейинроқ муаллиф яна бир видео эълон қилди. Унда дўкон ойнасида моделларнинг фотосуратлари йўқлигини кўриш мумкин.
«Боллар, мана буни қаранглар. Кечаги видеодан кейин бу ердаги фоҳишаларнинг расмини олиб ташлашибди. Раҳбарларга тушунгани учун раҳмат. Кўряпсизми, ҳаммамиз бир жамоа бўлиб муштни бир жойга урсак, кўп ишларни ҳал қилиб ташласак бўлади», — дея мурожаат қилди у обуначиларга.
«Газета.uz» Milavitsa дўконлар тармоғи раҳбарияти билан боғланганда, улар ҳокимлик талабига кўра моделларнинг суратларини олиб ташлашганини айтишди. Шунингдек, раҳбар бу талабни қўллаб-қувватлашини билдирди. Аммо тақиқ қўювчилар бунинг ҳуқуқий асосини келтириб бериши керак, деб ҳисоблашини айтди.
Мирзо Улуғбек тумани ҳокимлиги матбуот хизмати «Газета.uz»га маълум қилишича, дўкон вакиллари билан моделларнинг ички кийимдаги суратлари «инсон нуқтаи назаридан» тўғри келмаслиги юзасидан «тушунтириш суҳбати» ўтказилган.
«Бу ердан ҳар куни 5−6 минг одам ўтади. Бундай фотосуратларга йўл қўйиб бўлмайди», — дейилади ҳокимлик хабарида.
