15 февраль кунидан Сирдарё вилояти божхона бошқармасининг «Сирдарё» ва Тошкент вилояти божхона бошқармасининг «С.Нажимов» чегара божхона постлари орқали фуқаролар ва енгил автотранспорт воситалари ҳаракати вақтинчалик тўхтатилди, деб хабар қилди Давлат божхона қўмитаси ахборот хизмати.
Бу вазият Қозоғистоннинг «Қазигурт» («С.Нажимов») ва «Атамекен» («Сирдарё») ўтказиш пунктлари реконструкция қилиниши билан боғлиқ. Шу сабабли 15 февралдан ушбу постлар орқали пиёдалар, автобус, енгил ва юк кўтариш қобилияти 3,5 тоннагача бўлган юк автотранспорт воситалари ҳаракати реконструкция даврида вақтинчалик тўхтатилади.
Бу ўтказиш пунктлари орқали фақатгина юк кўтариш вазни 3,5 тоннадан юқори бўлган юк автотранспорт воситалари ҳаракати давом этади.
Фуқаролар ушбу ўтказиш пунктларига муқобил сифатида иш тартиби куну-тун бўлган «Ғишткўприк» ва «Яллама» ҳамда иш тартиби куннинг ёруғ вақтида бўлган «Малик» ва «Оқ олтин» ўтказиш пунктлари орқали ҳаракатланишлари мумкин.
