Ўзбекистоннинг Истанбул шаҳридаги Бош консулхонаси айни вақтда Туркиянинг жанубий вилоятларида бўлиб турган фуқароларга мурожаат йўллади.
Унда фуқаролар кучли зилзилалар қайта содир бўлаётгани сабабли айрим қоидаларга қатъий риоя қилишга чақирилди.
Агар сиз зилзила содир бўлаётган вилоятларда бино ичида бўлсангиз, ҳужжатлар ва зарур нарсаларни олиб, бинодан тезда чиқинг. Хонадан чиқаётганда лифтда эмас, зинапоялардан фойдаланинг. Кўчада қолинг, лекин бинолар ёнида турманг, очиқ жойга ўтинг. Тинчланинг ва бошқаларни тинчлантиришга ҳаракат қилинг! — дейилади огоҳлантириш хабарида.
Мамлакат элчихонаси ҳам зилзила бўйича маълумот бериб, турк халқига моддий-маънавий ҳамдардлик кўрсатиш мақсадида кўплаб фуқаролардан таклифлар келиб тушаётганини билдирди.
Қишки кийим-кечак, ёпинчиқ ёки бошқа шаклдаги моддий ёрдам кўрсатиш истагидаги фуқаролар тўғридан-тўғри Анқара шаҳридаги элчихона (+90 538 035 85 34) ёки Истанбулдаги Бош консулхона (+90 212 323 20 37, +90 212 323 20 39)га мурожаат этишлари мумкин.
Эслатиб ўтамиз, Ўзбекистон Туркияга зилзиладан жабр кўрганлар учун гуманитар ёрдам ва Фавқулодда вазиятлар вазирлигининг бир гуруҳ қутқарувчиларини жўнатади. Вазирликнинг аниқлик киритишича, 60 нафар ФВВ қутқарувчилари ҳамда 3 та махсус авария-қутқарув техникаси юборилмоқда.
Янгиланган маълумотларга кўра, зилзила оқибатида 1014 киши ҳалок бўлди.
