Туркияда президентлик ва парламент сайловлари 14 май куни бўлиб ўтади
Туркия президенти Ражаб Тоййиб Эрдўғон Бурса шаҳрида ёшлар билан учрашувда республикада президентлик ва парламент сайловлари 14 май куни бўлиб ўтишини маълум қилди.
Шунингдек, у 10 март куни сайлов ўтказиш тўғрисидаги фармонни имзолашини, шундан сўнг сайлов кампаниясини ўтказиш учун қонунда белгиланган 60 кунлик муддат бошланишини таъкидлади, деб хабар бермоқда TRT.
Аввалроқ сайловлар 18 июнь куни ўтказилиши режалаштирилган эди. Сайлов муддатининг ўзгариши мухолифат номзодлари сайловолди ташвиқотлари учун вақтларини сезиларли даражада йўқотиши таъкидланмоқда. Давлат раҳбари сайлов муддатнинг ўзгаришига минтақанинг мавсумий хусусиятлари ҳамда талабалар учун имтиҳонлар июнь ойида бошланишини сабаб қилиб келтирди.
Калифорнияда содир бўлган отишмада ўн киши оламдан ўтди
АҚШнинг Калифорния штати Монтерей-Парк шаҳридаги корхонада содир бўлган отишмада ўн киши ҳалок бўлди. Ушбу жиноятни содир этганликда гумон қилинган шахс воқеа жойидан қочиб, тез орада ўзини отиб ўлдирган, дея хабар бермоқда BBC.
Якшанба куни маҳаллий полиция қирғинда гумон қилинган шахс яқин атрофдаги Алҳамбра шаҳрида полиция томонидан йўли тўсилган оқ пикапда ўзини отиб ўлдирганини маълум қилди.
Полиция ўзини отиб ўлдирган оммавий қотилликда гумонланувчи 72 ёшли маҳаллий осиёлик Ху Кан Тран эканлигини аниқлади.
Суриянинг Алеппо провинциясида бино қулаши оқибатида 16 киши ҳалок бўлди
Якшанба куни Сурия шимолидаги Алеппо провинциясида турар-жой биносининг қулаши оқибатида 16 киши ҳалок бўлди, яна 4 киши жароҳатланди, деб хабар бермоқда Хитойнинг Синьхуа ахборот агентлиги.
Шайх-Мақсуд туманидаги асосан курдлар истиқомат қиладиган 5 қаватли бино сувнинг ювилиши оқибатида қулаб тушди. ИИВ маълумотларига кўра, уйда 7 та оила яшаган.
Эронда уч нафар аёл журналист қамоққа олинди
Эрон Журналистлар уюшмаси пойтахт Теҳронда аёл журналистлар Мелика Ҳошимий, Саиде Шафиий ва Меҳрнуш Зарий ҳибсга олинди, дея хабар бермоқда Jamaran нашри.
Қайд этилишича, журналистлар Мелика Ҳошимий, Саиде Шофиий ва Меҳрнуш Зарий Теҳрондаги Эвин қамоқхонасида сақланмоқда.
Шафиийнинг режимга қарши тарғибот ва миллий хавфсизликка таҳдид қилганликда айблангани қайд этилган бўлса-да, қолган 2 журналистга қўйилган айбловлар ҳақида маълумот берилмаган.
Эрон инсон ҳуқуқлари фаоллари ахборот агентлигига кўра, ўтган йилнинг сентябрь ойида намойишлар бошланганидан буён мамлакатда 79 журналист ҳибсга олинган.
Қозоғистонда собиқ McDonald’s ресторанлари номсиз ҳолда қайта очилди
23 январь куни Олмаотада илгари McDonald’s бренди остида ишлаган ресторанлар қайта очилди.
Ресторанларга эгалик қилувчи Food Solutions KZ бош директори Асет Машановнинг айтишича, барча шаҳарларда ресторанлар аста-секин очилади. Ёпилишдан олдин компания мамлакатнинг 6 шаҳрида 20 дан ортиқ McDonald’s ресторанларига эга эди.
Пешлавҳаларга «Биз очиқмиз» (рус тилида бўлиши керак — таҳ.) деб ёзилган бўлиб, бунда аввалги логотипни эслатувчи «М» ҳарфи сариқ рангга бўялган. Тармоқ номи тез орада тақдим этилади.
Хитойда бир ҳафта ичида қарийб 13 минг киши коронавирусдан вафот этди
Касалликларнинг олдини олиш ва назорат қилиш маркази (CDC) баёнотига кўра, Хитойда 13−19 январь кунлари вирус туфайли 12 658 киши вафот этган вафот этди.
2022 йилнинг 8 декабридан 2023 йилнинг 12 январига қадар мамлакатда КОВИД-19 чоралари бекор қилинганидан кейин вирус туфайли 59 938 киши вафот этган. Шундай қилиб, охирги эпидемия тўлқинида тасдиқланган ўлимлар сони 72 минг 596 нафарга кўтарилди.
Қайд этилишича, айни пайтда мамлакат аҳолисининг 80 фоизи вирус билан касалланган.
Нурсултон Назарбоев юрак жарроҳлик амалиётидан сўнг шифохонадан чиқди
Қозоғистоннинг собиқ президенти Нурсултон Назарбоев юрак жарроҳлик амалиётидан сўнг Остонадаги миллий илмий кардиология марказидан чиқарилди, деб хабар берди РИА Новости ўз манбасига таянган ҳолда.
Жарроҳлик амалиёти таниқли қозоғистонлик кардиожарроҳ Юрий Пя томонидан ўтказилди.
20 январь куни Назарбоевнинг матбуот котиби Айдос Укибай сиёсатчининг юраги жарроҳлик амалиёти ўтказилгани ва операция муваффақиятли якунланганини маълум қилди. Унинг сўзларига кўра, операция Миллий кардиожарроҳлик илмий марказида бўлиб ўтган.
Лотин Америкаси давлатлари умумий пул бирлигини жорий этмоқчи
Лотин Америкаси давлатлари ўртасида «умумий валюта»га ўтиш ҳақида гап кетмоқда. Бу ҳафта бошланадиган Лотин Америкаси Кариб ҳавзаси давлатлари ҳамжамияти саммити олдидан Аргентина иқтисодиёт вазири аввалроқ Бразилия билан кун тартибига олиб келинган лойиҳада барча минтақа давлатларини иштирок этишга чақирди.
Аргентина иқтисодиёт вазири Сергио Масса Британиянинг Financial Times газетасига мавзу юзасидан баёнот берди.
Массанинг таъкидлашича, лойиҳа дастлаб Бразилия билан икки томонлама ташаббус сифатида кўтарилган.
Аргентиналик вазир 24 январь куни Лотин Америкаси ва Кариб ҳавзаси давлатлари ҳамжамиятининг саммити олдидан нутқ сўзлаб, минтақа давлатларини лойиҳада иштирок этишга чақирди.
Саммитда янги валютанинг минтақавий савдога эҳтимолий таъсири ва АҚШ долларига қарамлиги муҳокама қилинади.
