Украинада вертолёт қулаб тушиши оқибатида мамлакат ИИВ раҳбари ва бошқалар ҳалок бўлди
Украинанинг Киев вилояти Бровари шаҳрида 18 январь тонгида Давлат фавқулодда вазиятлар хизматига тегишли вертолёт қулаб тушди.
Авиафалокат оқибатида Украина Ички ишлар вазирлиги раҳбарияти: вазир Денис Монастирский, унинг биринчи ўринбосари Евгений Енин ва давлат котиби Юрий Лубкович ҳалок бўлган.
Ҳозиргача 17 кишининг ҳалок бўлгани маълум, қурбонларнинг 9 нафари вертолёт бортида бўлган. Ҳодиса оқибатида икки нафар бола ҳам вафот этган — вертолёт болалар боғчаси олдига қулаган.
2022 йилда дунё бўйлаб 86 журналист ўз вазифасини бажаргани учун ўлдирилган
ЮНЕСКО 2022 йилда дунё бўйлаб 86 нафар журналист касбий фаолияти учун ўлдирилганини маълум қилди.
2022 йилда журналистлар учун энг хавфли мамлакатлар Мексика (19 нафар мухбир ўлдирилган), Украина (10 нафар) ва Гаити (9 нафар) бўлди. Осиё ва Тинч океанида 16 та, Шарқий Европада эса 11 та қотиллик содир этилган.
Журналистларни ўлдирганлик учун айбдорларнинг жазоланмаслик даражаси «ҳайратланарли даражада юқори» — 86 фоиз бўлиб қолаётгани маълум қилинди.
2022 йилда, шунингдек, журналистлар ўғирлаш, ўзбошимчалик билан ҳибсга олиш, қонуний таъқиб ва рақамли зўравонликлар қурбони ҳам бўлишган.
Вьетнам президенти истеъфога чиқишини эълон қилди
Вьетнам президенти Нгуен Суан Фук истеъфога чиқишини маълум қилди, кейинроқ эса мамлакат Коммунистик партияси Марказий кенгаши унинг истеъфосини маъқуллади, дея хабар берди BBC.
Қайд этилишича, сўнгги ҳафталарда президентнинг истеъфога чиқиши ҳақида кўплаб миш-мишлар тарқалган. Нгуен Суан Фук мамлакат ҳукуматини бошқарган даврда ишлаган икки бош вазир ўринбосари истеъфога чиққанидан кўп ўтмай унинг ўзи ҳам истеъфога чиқишини эълон қилди.
Бундан ташқари, икки вазир ва бошқа бир қатор ҳукумат амалдорларига нисбатан жиноий иш очилган.
Айни пайтда Вьетнам Коммунистик партиясида қаттиқ тартиб-интизом тарафдорлари томонидан олиб борилаётган коррупцияга қарши кампания давом этмоқда. Юзлаб Вьетнам коммунистлари терговга олинган.
Перудаги норозилик намойишларида ҳалок бўлганлар сони 42 нафарга етди
Перуда президент Педро Кастильонинг лавозимидан четлатилиши ва ҳибсга олиниши ҳамда янги президент Дина Болуартенинг тайинланишига қарши намойишлар тўхтагани йўқ. Лимада беш ҳафта ичида полиция билан тўқнашувларда камида 42 киши ҳалок бўлди, улар орасида ўсмирлар ҳам бор
Намойишлар фонида меҳнат вазири Эдуардо Гарсия истеъфога чиқишини эълон қилди. Унинг сўзларига кўра, мамлакат ўлим учун узр сўраши керак ва ҳукуматни хатоларни тан олишга ҳамда 2024 йилги сайловларни кутмасликка чақирди.
Финляндия ЕИда биринчи бўлиб уран қазиб олишни бошламоқчи
Финляндия атом электр станциялари учун ёқилғи сифатида ишлатиш мақсадида уранни қазиб олишни бошлайди. Ҳозирда уран Европа Иттифоқининг бирорта давлатида қазиб олинмайди.
Давлатга қарашли Terrafame компанияси 2024 йил ёзигача Соткамо вилоятидаги Талвиваара конида уран қазиб олишни бошлаш режаларини эълон қилди. Ҳозирда конда асосан электромобиллар учун аккумуляторлар ишлаб чиқаришда қўлланиладиган никел ва кобальт қазиб олинади.
Компания маълумотларига кўра, кондан қазиб олинаётган ҳар бир килограмм рудада тахминан 17 миллиграмм уран бор ва шу пайтгача у саноат чиқиндилари сифатида таснифланган. Terrafame йилига 200 тоннага яқин уран ишлаб чиқаришни кутмоқда.
Лойиҳага киритиладиган инвестициялар тахминан 20 млн еврони ташкил этди. Қазиб олинган уран хорижга экспорт қилиниши тахмин қилинмоқда.
Microsoft 10 мингга яқин ишчисини истеъфога чиқаради
АҚШнинг технология компанияларидан бири Microsoft йилнинг учинчи чораги охиригача 10 минг ходимини ишдан бўшатишини маълум қилди.
Microsoft раҳбари Сатья Наделла компания муҳим ўзгаришлар даврини бошидан кечираётгани, мижозлар ва бизнес ҳамкорлар билан учрашувлар ўтказганини таъкидлади.
Мижозларнинг рақамли харажатларини оптималлаштирганликларини ифода этган Наделла: «Дунёнинг баъзи қисмлари таназзулга юз тутаётгани ва баъзилари турғунликни кутаётгани учун ҳар бир соҳа ва географиядаги ташкилотларнинг эҳтиёткорлик билан ҳаракат қилаётганини ҳам кўрамиз» деди.
Сатья Наделла бу рақам Microsoft умумий ходимларининг 5 фоиздан камроғига тўғри келишини эслатиб ўтди ва айрим соҳалардаги лавозимларни йўқ қилиш билан бирга, муҳим стратегик соҳаларда кадрларни ёллашда давом этишини таъкидлади.
Францияда дунёдаги энг кекса аёл 118 ёшида вафот этди
Дунёдаги энг кекса аёл Люсиль Рандон Франциянинг Тулон шаҳридаги қариялар уйида 118 ёшида уйқусида вафот этди.
Люсиль Рандон 1904 йил 11 февралда Францияда туғилган. Ёшлигида у тарбиячи бўлган, кейин касалхонада ишлаган ва 41 ёшида у роҳиба бўлишга қарор қилган. 28 йил давомида у Вичи касалхонасида ишлаган, у ерда етимлар ва қарияларга ёрдам берган.
2022 йил апрель ойида Японияда 119 ёшли Кейн Танака вафотидан сўнг Рандон Европанинг энг кекса аҳолиси ҳисобланган. Кўплаб интервьюларида француз аёл Яратганнинг иродаси ҳақида гапириб, узоқ умр кўриш сабабларини айтишдан бош тортган.
Европада сайёҳлар сони КОВИД-19 пандемиясидан аввалги даражага яқинлашди
Европа статистика бошқармаси (Eurostat) 2022 йилда аъзо мамлакатларда бир кеча-кундузда туристларни жойлаштириш бўйича маълумотларни эълон қилди.
Унга кўра, пандемияда жиддий зарар кўрган Европа Иттифоқи туризм сектори ўтган йили сезиларли даражада тикланган.
Эпидемиядан олдинги 2019 йилда туристик объектларда тунашлар сони 2,88 млрд мартани ташкил этган бўлса, 2022 йилда бу кўрсаткич 2,72 млрд мартага етди. Шундай қилиб, ЕИ мамлакатларидаги туристик объектларда тунаш эпидемиядан олдинги 2019 йилга нисбатан атиги 5,6 фоизга ортда қолмоқда.
Европа Иттифоқи мамлакатларида тунги туристик турар жой 2020 йилда 1,42 млрд, 2021 йилда эса 1,83 млрд мартани ташкил этган.
