26 декабрь куни Ўзбекистон Марказий сайлов комиссиясининг навбатдаги мажлисида Олий Мажлис Қонунчилик палатаси депутати Расул Кушербаевнинг ваколатини муддатидан илгари тугатиш тўғрисидаги қарор қабул қилинди, дея хабар бермоқда «Газета.uz» мухбири.

Мажлис давомида комиссия аъзоларидан фақат биттаси депутатнинг мандатдан воз кечиш сабабларини сўради. МСК раҳбари Зайниддин Низомхўжаев эса аризада сабаблар кўрсатилмаганини айтди.

Шундан сўнг комиссия Олий Мажлис Қонунчилик палатаси депутати Расул Кушербаевнинг депутатлик фаолиятини муддатидан олдин тугатиш тўғрисидаги қарорни бир овоздан маъқуллади.

Шунингдек, Олий Мажлис Сенати аъзоси Фарход Эрманов Қорақалпоғистон Жўқорғи Кенгесининг қарорига асосан Қорақалпоғистон Вазирлар Кенгашининг раиси лавозимига тайинланганлиги муносабати билан унинг ёзма аризасига кўра, сенаторлик ваколати муддатидан илгари тугатилди.

23 декабрь куни Расул Кушербаев депутатлик фаолиятини якунлашини эълон қилганди. «Бундай ишлай олмас эканман. Бунга мажбур бўлганимдан афсусдаман», — дея ёзганди у.

Шундан сўнг тармоқларда депутат Расул Кушербаевнинг Қонунчилик палатаси мажлисида кун тартибига доир савол бермоқчи бўлгани, бироқ парламент қуйи палатаси спикери ўринбосари Улуғбек Иноятов эътиборга олмагани акс этган видео тарқалганди. «Бундай йиғилишда ўтиргандан ўтирмаган яхши. Мен кетаман. Ҳаммаси ясама, сўз бермайди», — дея гапирган у.

«Газета.uz» Қонунчилик палатаси 2023 йилги давлат бюджетини 3 соатдан кам вақт ичида (3 ўқишда) муҳокама қилгани ва тасдиқлагани ҳақида ёзганди. Қонун лойиҳасининг ўзи салкам бир ҳафта олдин қуйи палатага киритилди ва жамоатчилик муҳокамасига ҳам тақдим этилмади. Ҳужжат деярли бир овоздан, танқидларсиз қабул қилинди.