Ижтимоий тармоқларда Ўзбекистон Олий Мажлиси Қонунчилик палатаси мажлисида ЎзЛиДеП депутати Расул Кушербаевга келаси йилги давлат бюджети лойиҳаси юзасидан савол бериш имконияти берилмагани акс этган видео тарқалди.
Видеода тасвирланган воқеалар 19 декабрь куни 2023 йилги давлат бюджети ва 2022 йилги давлат бюджети харажатларини ошириш тўғрисидаги қонун лойиҳасини биринчи ўқишда муҳокама қилиш чоғида бўлган.
Депутат йиғилишга раислик қилган парламент қуйи палатаси спикери ўринбосари, ЎзХДП етакчиси Улуғбек Иноятовдан сўз беришни сўрагани, бироқ унинг илтимоси эътиборга олинмаганини айтган.
Улуғбек Иноятов
Видеода Кушербаев қўлини кўтариб, ўрнидан тургани, ҳамкасбларига ва атрофга қараб, унга савол беришга имкон берилмаганини айтганини кўриш мумкин. У ўрнидан турганида эса бир киши олдига келиб, нима муаммо эканлигини сўраган. Депутат нега сўзга чиқиш имкони берилмасдан туриб лойиҳа овозга қўйилганини таъкидлаган.
«Туриб айтаман ҳозир, нега сўз бермайди, тушунмадим. Бундай йиғилишнинг нима кераги бор? Мен кун тартибидаги саволни бермоқчиман, нега овозга қўйиб юборишди? Кечирасиз, мен сўз сўрагандим, нега сўз бермаяпсиз?» — дея баланд овозда сўраган депутат.
Ҳеч қандай жавоб эшитмаган Расул Кушербаев: «Мен кетдим… Бундай йиғилишда ўтиргандан ўтирмаган яхши. Мен кетаман. Ҳаммаси ясама, сўз бермайди». Шундан сўнг у видеоёзувни ўчирган.
Орадан бир неча кун ўтиб, 23 декабрь куни Расул Кушербаев депутатлик фаолиятини якунлашини эълон қилганди. «Бундай ишлай олмас эканман. Бунга мажбур бўлганимдан афсусдаман», — дея ёзганди у.
«Газета.uz» Қонунчилик палатаси 2023 йилги давлат бюджетини 3 соатдан кам вақт ичида (3 ўқишда) муҳокама қилгани ва тасдиқлагани ҳақида ёзганди. Қонун лойиҳасининг ўзи салкам бир ҳафта олдин қуйи палатага киритилди ва жамоатчилик муҳокамасига ҳам тақдим этилмади. Ҳужжат деярли бир овоздан, танқидларсиз қабул қилинди.
