Депутатлик фаолиятини якунлашини эълон қилган Расул Кушербаев Qalampir.uz`га интервью берди.
Қарорини шарҳлар экан, у «айрим идоралар» ва «айрим раҳбарлар»нинг парламент ҳамда депутатларга бўлган муносабатидан жуда хафа эканини айтди.
«Президентимиз парламент бу — демократия мактаби деган. Бу ерда одамлар демократия нималигини ўрганиши керак, ёшлар келиб баҳс-мунозараларни кўрсин, деган. Халқнинг манфаати йўлида хизмат қиладиган қонунлар қабул қилиниши керак бўлган жой, деган. Қонунлар қабул қилишда ҳар доим у қонун халқни фойдасига хизмат қиладими ёки зараригами, шуни инобатга олинглар, деган», — деди Расул Кушербаев.
«Шунча гаплардан кейин ҳам бошқа идораларнинг, айрим амалдор раҳбарларнинг депутатларга, парламентга муносабати бундай сақланиб қолаётганидан жуда ҳам афсусдаман. Қаттиқ хафаман парламентга бундай муносабат бўлаётганидан», — дея сўзларини қайтарди депутат.
«Давлат раҳбари қайта-қайта чиқишларда такрорлаяпти, лекин амалда бошқаларнинг муносабати ўзгармаяпти, тўғриси. Бунақа жойда ишлаш қийин», — деди Кушербаев.
Ундан интервью олган журналист депутатнинг кайфияти уни «фуқаро сифатида» қўрқитаётганини айтган.
«Қўрқманглар, нега қўрқасиз. Шунчаки, кўп ишларимизнинг фойдаси бўлмаяпти. Ўзгариш йўқ», — дея жавоб берган у.
Депутат яқин кунларда ишдан кетишини тасдиқлади. «Шунинг учун яқин кунларда ишдан кетмоқчиман. Шунга қарор қабул қилдим. Бошқа йўли қолмади».
«Ҳозир нима қилиб юрибмиз. Ўзгаришлар бўлишини хоҳлаяпмиз. Лекин кўп жойларда иккиюзламачилик бўлиб ётибди. Асосий айбдор ўзимиз. Айб ўзимда. Ўзимда энг кўп камчиликлар бор. Шу шароитга мослашолмадим», — деди Расул Кушербаев.
«Бунақа ишлар бўлаётганини ёнида туриб кузатиш ва чидаш қийин. Ҳақиқий азоб. Буни кейин тушуниб етарсизлар. Раҳмат», — деди у.
